Anak Sakit

Anak Sakit
Posted by:

BEBERAPA hari ini, Mang Juhai dak pacak bebas keluar rumah. Sebab apo, baru nak kumpul dikit di poskamling atau di rumah tetanggonyo, bininyo yang supercerewet itu langsung manggil, bahkan kadang nelepon. Ngapo Bik Jubai laju mak itu ye, berikut kisahnyo.
Mang Juhai laju dak biso bebas nian beberapo hari ini. Bahkan, dio idak dibolehke oleh Bik Jubai untuk bepergian jauh, semisal ke depan lorong atau ke seberang. ‘’Kak, kakak tuh ingat, dak boleh pegi dulu. Paling kalo nak keluar, dekat rumah inilah, atau paling jauhlah ke poskamling kak ye,” ujar Bik Jubai samo Mang Juhai yang baru nak keluar pintu rumah.
‘’Yo dek, kakak tau, tenang bae, paling kakak ke rumah tetanggo atau di poskamling inilah,” jawab Mang Juhai. ‘’Adek nih serius kak, bukannyo maen-maen. Kakak kan tau dewek, anak kesayangan kakak tuh (Mac Dul,red) lagi sakit, badannyo panas terus. Kapan dio sakit, nak minta dilayani dengan Abahnyo tulah,” ungkap Bik Jubai.
‘’Tau dek, sabar bae, ini kan memang lagi musim pancaroba, idak bagus cuacanyo. Jadi wajar bae, kalo banyak budak yang sakit, bahkan kito tuo bae pacak sakit. Selain itu kan, Mac Dul la sudah kito bawak berobat ke dokter, kalo kamu masih dak pecayo dokter, kito nak berobat kemano lagi dek,” urai Mang Juhai sambil bebalek badan ngadap Bik Jubai.
Alhasil, baru beberapo menit duduk di rumah tetanggonyo, Mang Juhai la dipekiki Bik Jubai, disuruh balek, kareno Mac Dul nak inilah, nak itulah. Selain itu, pernah bae Mang Juhai nak nobar Piala Dunio di poskamling dekat rumahnyo, lagi lemak cerito, dio lah ditelepon Bik Jubai disuruh balek, kareno Mac Dul lagi sakit itulah.
‘’Ngapo ayuk lagi kando,” tanyo Mang Oding, begitu Mang Juhai nak ngangkat teleponnyo yang bebunyi. ‘’Yo Ding,” jawab Mang Juhai. ‘’Yo sudah, balek lah dulu kando, namonyo anak lagi sakit, lagi nak disayang Abahnyo nian. Kalo lagi sehat kan, idak pulok Mac Dul nak nyari kando nian. Makonyo bersyukur bae, Mac Dul masih ingat dengan kando sebagai Abahnyo,” kato Mang Oding.
‘’Benar jugo kato kau tuh Ding, makmano kalo kito dak diingat lagi oleh anak, la dak lemak pulok idup. Sepakat aku Ding, balek dulu aku. Mak itulah guno bekawan tuh Ding, saling support,” tutur Mang Juhai sambil betegak balek. ‘’Yolah kando, kagek kapan Mac Dul la sehat, nak kemano kito, idak akan dicarinyo lagi, yakin bae kando,” tambah Mang Oding. Hahaha, benar pulok uji Mang Oding itu, untung anak ingat dengan Abahnyo, cubo kalo idak, la dak lemak pulok kito idup. (sam)

Subscribe

Thanks for read our article for update information please subscriber our newslatter below

No Responses