Dapat BB

Dapat BB
Posted by:

MANG Juhai dan Mang Oding ngumpulke tetanggo di kampungnyo. Sebab, janji dari caleg jagoannyo, setiap warga yang datang akan dapat BB. Apo sebenarnyo BB dimaksud Mang Juhai, baco bae ceritonyo sampe selesai.
Siang kemaren, Mang Juhai dan Mang Oding ngumpulke warga di kampungnyo. ‘’Bapak-bapak, Ibu-ibu kito kumpul ye di rumah aku sekarang, kareno bakal ado caleg jagoan kito nak sosialisasi,” ujar Mang Juhai. ‘’Yo bapak-bapak, ibu-ibu, rugi kalo kamu idak datang,” timpal Mang Oding. ‘’Memang nak dikasih apo Mang oleh caleg kito itu,” tanyo salah sikok ibu-ibu.
‘’Aku dak tau pasti, selain nak ngobrol, katonyo bakal ado yang dikasihke oleh caleg jagoan kito itu. Tapi kito jangan jingok regonyo, namun harus ngehargoi niat baek uwong yo,” tutur Mang Juhai senyum-senyum. ‘’Pokoknyo bakal ado yang dibawak balek ye, kato humas caleg kito itu, kagek seluruh yang datang akan dapat BB,” ungkap Mang Oding.
Idak lamo, warga langsung kumpul depan rumah Mang Juhai. Setelah itu, sang caleg yang ditunggu memang datang kesano. Karuan bae, suasana langsung rame nyambut caleg itu, kareno seluruh warga berebut salaman. Bahkan, ado ibu-ibu yang lagi hamil, minta dipegang perutnyo, dengan tujuan supayo anaknyo nurut pecak suksesnyo caleg itu.
Setelah ngobrol dan menyerap aspirasi warganyo, sang caleg pamit balek. ‘’Bapak-bapak, ibu-ibu, aku minta doa dan dukungannyo, semoga aku berhasil menjadi anggota dewan. Kareno masih banyak tempat nak dikunjungi, jadi aku pamit balek,” terang sang caleg dihadapan warga. ‘’Yo Pak, semoga bapak tambah sukses, semoga amanah setelah jadi dewan Pak,” celetuk salah sikok ibu-ibu bejilbab di kampung itu.
Begitu sang caleg balek, Mang Juhai dan Mang Oding, langsung bagike kantong sikok-sikok dengan warga yang datang. Pas dibukak warga, ternyato kantong itu berisi kartu namo sang caleg, samo selembar baju batik. ‘’Nah mang, kato kamu kagek bakal dikasih BB, ngapo ini Cuma dikasih baju batik ini,” ujar Mang Somad, tetanggo Mang Juhai dan Mang Oding.
‘’Yolah, samo kan BB. BB maksud kami itu baju baru (BB), bukannyo Blackberry. Kamu bae idak betanyo dengan jelas, apo maksud BB dari kami tadi,” tukas Mang Juhai. ‘’Yo Somad kau ini, mahal lah rego BB ini daripado sembako yang galak dibagike caleg lain itu. Kemudian, baju ini kan baju batik, kan biso dibawak kondangan,” terang Mang Oding. La benar pulok kamu mang, BB itu kan belum tentu Blackberry, kan biso baju baru atau baju batik. Hehehe. (sam)

Subscribe

Thanks for read our article for update information please subscriber our newslatter below

No Responses