Dirutuki Mertuo

Dirutuki Mertuo
Posted by:

BETAPO malunyo Mang Juhai, pas ditanyo mertuo lanangnyo masalah duit sosok beli gado-gado beberapo hari lalu. Memangnyo kemano duit itu yo, baco bae ceritonyo dibawah ini.
Beberapo minggu ini, mertuo Mang Juhai memang sedang berado di Palembang, tentu bae nginap di rumah Mang Juhai. Namonyo jugo uwong tuo, tentu bae banyak kendaknyo masalah makanan. ‘’Susah nian sekarang ini Jubai ai. Jangankan makan dak belauk, makan belauk bae belum tentu nafsu. Terkadang bukan nak cerewet, banyak nian kendak masalah makanan sekarang ini,” kato mertuo lanang Mang Juhai samo Bik Jubai.
‘’Yo mak itulah Ubak, namonyo jugo la tuo. Sekarang Ubak nak makan apo, kagek kami belike,” tanyo Bik Jubai. ‘’Benar, Ubak nak makan apo, biar ado nafsu dan perut Ubak pacak berisi dikit,” timpal Mang Juhai. ‘’Aku pengen makan gado-gado rasonyo, tapi jangan pedas nian, kagek laju dak temakan pulok,” kato mertuo lanang Mang Juhai.
Setelah itu, mertuonyo ngasih duit Rp 100 ribu selembar untuk beli sebungkus gado-gado. Idak lamo, Mang Juhai balek bawak gado-gado pesanan mertuonyo. Tapi Cuma gado-gado yang dikasih, duit sosoknyo idak katek. Waktu itu, mertuonyo diam bae. Besoknyo, mertuo lanang Mang Juhai ngulang mintak belike brugo dan lakso.
‘’Juhai cubo belike lagi aku brugo atau lakso, rasonyo pengen nian makan barang itu,” ungkap mertuonyo. ‘’Yo sudah kagek kami belike, kalo memang Ubak nak makan brugo,” ujar Mang Juhai. Mang Juhai becepat beli makanan pesanan mertuonyo, setelah dikasih sang mertuo duit Rp 50 ribu selembar. Tapi, lagi-lagi Mang Juhai Cuma ngasih sebungkus brugo dan lakso, tapi sosoknyo idak dibalekke jugo.
Kareno kesal, mertuo lanang Mang Juhai laju tekontan samo Mang Juhai. ‘’Oy Juhai, alangkah mahal rego makanan di Palembang ini yo,” sindir mertuonyo. ‘’Rego standar, memangnyo ngapo Ubak,” Mang Juhai balek betanyo. ‘’Yo mahal lah. Madaki sebungkus gado-gado Rp 100 ribu, terus sebungkus brugo dan lakso Rp 50 ribu,” kato mertuonyo lagi.
Baru sadar Mang Juhai kalo sindiran mertuonyo itu ditujuke ke dio. ‘’Oy idak semahal itu Ubak. Duit sosoknyo itu, aku belike rokok dan minyak motor. Sudah tuh ado jugo dipake Jubai untuk beli minyak sayur dan telok,” jawab Mang Juhai dengan senyum dak kelemakan. ‘’Oh aku kiro memang mahal. Makonyo, kalo memang ngambek sosoknyo, ngomong. Dasar nian anak samo menantu idak begawe, pacaknyo ngabisi duit uwong tuo dan mertuo bae,” rutuk mertuo Mang Juhai.
‘’Yo sudah, kagek kami balekke Ubak kalo dak boleh,” timpal Bik Jubai sambil senyum-senyum kecut. ‘’Bukan masalah dibalekke atau idak, Cuma caro kamu bae dengan uwong tuo. Cubo kalo kami uwong tuo yang minjam duit, sepuluh ribu bae pasti ditanyoi terus,” ungkap mertuo Mang Juhai sambil senyum. ‘’Yo sudah kami minta maaf, kami salah Bak, lain kali idak lagi,” tambah Mang Juhai. Hahaha, makonyo Mang, duet mertuo atau uwong tuo itu boleh diambek, tapi minta, bukannyo idak balekke sosokan jajan mak itu. (sam)

Subscribe

Thanks for read our article for update information please subscriber our newslatter below

No Responses