Gilo Dangdut

Gilo Dangdut
Posted by:

MANG Juhai dan Mang Oding, sebenarnyo sudah lamo idak ke tempat hiburan malam. Namun, kareno ngehargoi kawan lamonyo, yang ngomong nak senang-senang bae, bukannyo nak mabok dan betinoan, akhirnya duo sohib kental itu, galak bae ngerewangi kawan-kawannyo disalah sikok tempat hiburan malam tekenal di kotanyo. Apo yang terjadi di tempat hiburan malam itu, berikut ceritonyo.
Beberapo malam liwat, Mang Juhai dan Mang Oding ditelepon kawan lamonyo, Mang Oby, kalo mereka lalamo pengen kumpul bareng pecak dulu, sekadar untuk senang-senang bae. ‘’Kando aku minta nyawo nian, jangan idak dating mala mini. Aku nak senang-senang, nyanyi-nyanyi bae. Aku tunggu di tempat biaso kumpul dulu dikawasan Veteran yo,” ujar Mang Oby melalui telepon.
‘’Nah kau ini Oby, kan kau la tau, kando kau nak tobat. Ngapo masih kau goda, untuk ke tempat hiburan malam,” jawab Mang Juhai. ‘’Oy kando, aku bukan nak nggoda kamu betobat, tapi sekadar nak senang-senang mala mini. Aku janji kando, kito dak katek acara mabok, apolagi betinoan. Pokoknyo kito nyanyi, paling pesan jus samo makanan bae, percayolah kando,” terang Mang Oby nyubo ngeyakinke Mang Juhai dan Mang Oding.
‘’Awas kalo kau macem-macem Oby, balek kami dari sano,” timpal Mang Oding dari belakang Mang Juhai yang nerimo telepon. ‘’Iyo kando, aku janji, makonyo datanglah kesini, kawan-kawan kito lain jugo sudah mulai datang ini, pasti seru cerito-ceritonyo,” tutur Mang Oby. ‘’Oke kalo mak itu, kami kesano bentar lagi,” kato Mang Juhai sambil nutup telepon. Setengah jam setelah itu, Mang Juhai dan Mang Oding sampe ke tempat hiburan malam dimaksud Mang Oby.
Begitu masuk ruangan, keduo sohib kental ini disambut Mang Oby dan kawan-kawan mereka lainnyo. ‘’Kando berhubung kami la agak lamo disini, dan sudah nyanyi pembuka. Makonyo mik ini kami serahke dengan kamu beduo,” ujar kawan mereka lainnyo bernamo Mang Edy. ‘’Yo sudah kalo mak itu, kami idak berubah masalah nyanyi, masih selera lamo tulah, dangdutan kito,” ujar Mang Juhai.
Ruponyo Mang Juhai dan Mang Oding, merupoke uwong yang pertamo kali malam itu, nyanyi dangdutan di ruangan itu. Sebab, Mang Oby Cs, ternyato nyanyi lagu rock, bahkan lagu-lagu baso inggris galo. ‘’Baru kamu inilah dangdutan disini kando, kami lagu rock, pop dan baso inggris galo disini tadi,” sindir Mang Oby. ‘’Ay kamu tuh Cuma malu bae ngaku, kalo pecandu atau gilo dangdut. Biarlah kando yang mulai, biar yang laen melok galo,” simbat Mang Oding sambil senyum-senyum kecik.
Alhasil, setelah duo sohib itu nyanyi dangdut, Mang Oby cs, berebut nyari lagu dangdut. ‘’Nah kan, baru keluar aslinyo, gilo dangdut. Tadi tu pecak jaim galo kamu ni,” pekik Mang Juhai. ‘’Iyo kando, malu kito nak nyanyi dangdut, sebab kawan-kawan lagu gaul galo tadi tuh. Sekarang idak malu lagi, kan ado kando beduo paling idak yang samo nyanyi dangdut,” ujar Mang Oby.
Benar nian, ternyato segalo kawan-kawan mereka disano, hafal galo ruponyo dengan lagu dangdut, jadi wajar dikatoke gilo dangdut galo. ‘’Nah kan tebukak galo kedoknyo, hobi nyanyi dangdut kamu-kamu ni ye,” tambah Mang Juhai. Hahaha, benar itu mang, kito sebagai uwong Indonesia, harus lebih menghargoi dangdut, daripado lagu-lagu baso luar itu. Hehehe. (sam)

Subscribe

Thanks for read our article for update information please subscriber our newslatter below

No Responses