HP Lamo Ilang

HP Lamo Ilang
Posted by:

MANG Juhai sempat menggerutu dewek samo nasibnyo yang pecaknyo idak kunjung berubah dari tahun ke tahun. Kali ini, Mang Juhai meraso rejekinyo yang dari modal Hp jugo idak membantunyo. Ngapo pacak mak itu mang, baco bae ceritonyo sampe tuntas yo.
Pas baco Koran pagi di teras rumah samo Mang Oding, Mang Juhai baru teringat kalo sebentar lagi nak Imlek. ‘’Oh yo Ding, bentar lagi Imlek ruponyo,” kato Mang Juhai sambil nyedot kopi buatan bininyo yang kental dan lemak itu. ‘’Yo kando, memang akhir bulan inilah katonyo Imlek. Ado usul apo rencano kando,” Mang Oding balek betanyo.
‘’Sebenarnyo banyak sih rencano Ding, tapi gagal galo, gara-gara Hp lamo ilang. Kan kau tau dewek kalo sekarang kando Hp baru, sementaro yang lamo nyampak waktu bemotor make celano dasar dulu Ding,” ucap Mang Juhai sambil garuk-garuk kepala. ‘’Mak ini kando, maaf kalo aku kurang paham nian dengan omongan kamu itu. Tapi, apo hubungannyo antaro rencano dengan Hp lamo ilang,” ungkap Mang Oding.
‘’Hp lamo kando itu la banyak nian memori isinyo nomor telepon kawan Ding. Mulai dari kawan-kawan sesamo nganggur, sampe pejabat maupun plisi, segalo nomor teleponnyo ado disano. Jadi rugi besak nian kando kau ni dengan ilangnyo Hp itu,” jelas Mang Juhai. ‘’Aku tau kando, tapi yang aku idak paham tu, apo hubungannyo dengan rencano kito,” cecar Mang Oding.
‘’Mak ini Ding, kalo Hp kando kau idak ilang, mungkin sekarang kito pacak nelepon kawan-kawan kito yang warga keturunan itu, nanyo kabar dan lagi dimano. Mungkin dari tanyoan itu, akan ado omongan yang memang diharapke oleh kito. Apolagi momennyo pas, sebentar lagi uwong nak Imlek Ding,” terang Mang Juhai.
‘’Oh mak itu, siapo tau nyuruh sanjo pas Imlek kando ye. Selain silaturrahmi, siapo tau dapat angpao, jelas aku kalo mak ini kando. Itulah makonyo kando, kapan dapat nomor telepon kawan-kawan tu simpan jugo di Hp aku, biar kalo Hp kando ilang, masih ado nomornyo di Hp aku,” urai Mang Oding. ‘’Nah kan segalonyo jelas, kalo rencano kito berantakan gara-gara Hp lamo ilang,” tambah Mang Juhai. Hahaha, maksud kamu tu mang, kalo Hp lamo idak ilang, segalo kawan nak ditelepon, siapo tau disuruh ke rumah pas Imlek. (sam)

Subscribe

Thanks for read our article for update information please subscriber our newslatter below

No Responses