Tidok Numpuk

Tidok Numpuk
Posted by:

GARA-gara Bik Ana becerito kalo di villa tempat mereka nginap waktu di Kota Pagaralam kemaren, diduga banyak makhluk halusnyo, laju rombongan betino disano tidok numpuk di sikok kamar. Makmano kejadiannyo, simak ceritonyo sampe selesai yo.
Masih mengenai gawean Mang Juhai, Bik Jubai dan kawan-kawan lamonyo jalan-jalan ke Kota Pagaralam, beberapo waktu lalu. Ado cerito lainnyo, yang idak kalah menariknyo dari jalan-jalan itu. Dimano, lanang harus tidok samo lanang di sikok villa, sementaro betinonyo jugo sesame betino. Biarpun mereka banyak laki-bini yang pegi, tapi sesuai perjanjian, harus lanang samo lanang, dan betino samo betino.
‘’Kita sepakat yo, yang lanang tidok samo lanang, yang betino samo betino. Kalo nak tidok sekamar biarpun laki bini, nunggu sampe Palembang bae yo,” teriak Bik Anti, bininyo Mang Benu. ‘’Yo, sepakat aku kalo mak itu, biarlah kito samo betino, dan lanang samo lanang,” jawab Bik Jubai. ‘’Kami jugo sepakat kalo mak itu, kasihan jugo dengan kawan kito yang idak bawak pasangan berangkat ini,” ucap Mang Juhai sambil senyum tipis.
Alhasil, setelah tengah malam, dan acara gathering keluargo selesai dikerjoke, seluruh rombongan beranjak ke villa, untuk tidok. Sebelum tidok, ternyato Bik Ana, mulai becerito yang idak-idak. ‘’Kalo idak salah, aku pernah tidok di villa ini sebelumnyo, waktu berangkat dulu ayuk-ayuk. Kabarnyo, didaerah villa inilah, ado makhluk alusnyo. Apolagi, katonyo disini, pernah ado uwong meninggal, kareno beduo dengan lanang yang bukan mukhrimnyo,” tutur Bik Ana memulai omongan.
‘’Bebenar bae Ana, jangan kau nakuti mak itu, laju kagek idak tidok galo kito mala mini,” jawab Bik Anti. ‘’Yo nian yuk, kabarnyo seram nian, kalo idak salah di villa yang kito tempati inilah kejadiannyo,” terang Bik Ana lagi. Idak lamo ngomong mak itu, Bik Ana ngaku jingok makhluk halus liwat depan rainyo. ‘’Nah iyo nian pecaknyo yuk, aku jingok bayangan liwat dibagian dapur villa kito ini,” kato Bik Ana lagi sambil merinding ketakutan.
‘’Nah kacau kito kalo mak ini, la tau kito ni penakut galo dengan barang alus mak itu, masih nak diingatke, malah diceritoke nian oleh Ana ini. Sudah kalo mak itu, kito kumpul di sikok kamar bae malam ini, kagek ado apo-apo pulok,” ungkap Bik Jubai sambil narik selimut, kareno cuaca mulai dingin. ‘’Yo yuk, takut aku, kumpul bae kito disikok kamar, biarlah tidok numpuk,” celetuk Bik Oci, kawan mereka lainnyo.
‘’Berejolah nak tidok nguling, nak tidok duduk, yang penting kito kumpul bae mala mini, kalo malam besok berejo, apolagi kito la balek pulok,” jelas Bik Jubai. ‘’Nak kencing, nak apo, tahanke bae, sampe pagi baru kito ke kamar mandi kalo mak itu, ngeri nian aku. Soalnyo, bulu kuduk aku memang merinding nian yuk,” tambah Bik Ana sambil nutupi mukonyo pake selimut. Hahaha, ngapo pulok nak diceritoke yang mak itu Bik Ana, laju takut galo uwong, rasokelah ye tidok numpuk disikok kamar mak itu. (sam)

Subscribe

Thanks for read our article for update information please subscriber our newslatter below

No Responses