MANG Juhai bingung dengan hasil penghitungan suara calon walikota Palembang. Nak tau ngapo Mang Juhai pacak bingung cem itu, kito baco bae jalan ceritonyo.
Pagi-pagi sekali Mang Juhai la mbeli koran Palembang Pos, idak laen nak liat siapo yang tepilih jadi walikota Palembang sekarang ni. “Ding... aku bingung baco koran ni,” kato Mang Juhai samo Mang Oding yang duduk disampengnyo sambel ngopi. “Ngapo bingung tu kando,” tanyo Mang Oding.
“Aku mbaco hasel perhitungan suara calon walikota kito kemaren, ngapo laju haselnyo cem ini,” kato Mang Juhai bingung bolak balek koran. “Ai dah..., bingung ngapo kamu tu kando,” tanyo Mang Oding melok-melok bingung. “Cak mano idak bingung Ding..., hasel perhitungan, keduo calon walikota kito ni menang galo,” simbat Mang Juhai.
“Ai dak kado kando,” kato Mang Oding dak cayo. “Nah kau bae bingung kan. Apo Palembang ni nak dipimpin oleh duo ikok walikota,” tanyo Mang Juhai bengong. “Ai cacam-cacam kando..., dak mungkin cak itu. sudahlah idak usah dipekerken gino, daripado agek pening, lemak kito liat hasel akhernyo bae, sekarang kan belum final haselnyo,” kato Mang Oding njelasken.
Mang Juhai hanya manggut-manggut mendengar penjelasan Mang Oding, yang resminya menunggu pengumuman dari KPUD Kota Palembang. Hahaha, memang mak itulah kando, dak mungkin koran Palembang Pos nak bebohong, pasti dibuat apo adonyo. Kalo dibuat ado pemenang, sementaro hasil mak itu, kalo kagek laju kerok. (emma)