MANG Juhai pening tujuh keliling gara-gara Hp Blackberry (BB) kesayangannyo rusak. Ngapo mamang kito ini pacak pening, simak bae penuturannyo sampe selesai.
Minggu kemaren, BB kesayangan Mang Juhai rusak atau ngehang. ‘’Ai Ding, pening palak aku, gara-gara BB ngehang kemaren. Untunglah ado kawan lamo, jadi dibenarinyo BB aku. Tapi tulah, walaupun benari BB idak bayar, Cuma penyakit BB ni yang buat pening. Soalnyo, kapan la ngehang mak itu, abis galo nomor telepon dan kontak BB kawan,” kato Mang Juhai samo Mang Oding.
‘’Mak itulah penyakitnyo kando, idak biso lagi nak dicari. Abes galo, sisip dikit teko foto mesra kamu samo ayuk muda, ilang jugo,” sahut Mang Oding sambil senyum-senyum. ‘’Hus kau ni Ding, kagek tedengar ayuk kau di rumah, laju perang dunio ketigo. Makmanolah nak nyari kontak kawan-kawan itu Ding ye,” tanyo Mang Juhai.
‘’Dak pacak lagi kando, paling numpang nyalin dengan kawan-kawan tulah. Sabar bae kando yo, cobaan galo idup ini. Kontak dan nomor telepon ilang idak apo-apo, pacak mintak lagi, jangan bae betino mudo kamu itu yang ilang, pacak nambah mumet otak kamu mikirkennyo,” sambung Mang Oding sambil nahan ketawo.
‘’Neh kau ni Ding, bukannyo prihatin, malah nak ngolahke tulah. Susah nian samo kau ni, dak pernah serius itu. Oleh la lamo bae bedulur dengan kau ni, kalo idak, pacak emosi jugo anak mudo,” tutur Mang Juhai dengan rai merengut. ‘’Sabar kando, yo sudah, aku serius. Yang jelas, dak pacak lagi kando, minta ulang tulah, kalo kontak BB dan nomor telepon ilang di BB tu,” jelas Mang Oding.
‘’Nak mintaknyo itu kemano Ding. Iyo kalo ketemu dengan kawan-kawan tu, kalo idak, selamonyo kito ilang kontak,” ungkap Mang Juhai. ‘’Sudah kando, salin di Hp aku ni sebagian. Setelah itu, kamu minta dari kawan ke kawan tulah, itulah solusinyo,” terang Mang Oding. ‘’Benar jugo itu Ding, mokasih yo,” tambah Mang Juhai. Hahaha, sabar bae mang. Benar jugo kato Mang Oding, kontak ilang idak apo-apo, jangan bae ayuk mudo itu yang ngilang, hehehe. (sam)