MANG Juhai dan Mang Oding, cuma pacak ngerutuk, dengan demo buruh yang berlangsung di Jalan Jenderal Sudirman, kemarin. Ngapo mereka ngerutuk itu, baco bae ceritonyo sampe kelar yo.
Siang kemaren, Mang Juhai dan Mang Oding, dengan dandanan necis, dan dengan motor butut khas, berencano ngadiri pertemuan dengan pejabat plisi di seberang sano. Maklumlah, beberapa minggu ini, Mang Juhai dan Mang Oding, agak sibuk, kareno diajak oleh kawannyo jadi panitia jalan sehat, yang rencanonyo akan digelar duo minggu kedepan.
‘’Payo kando kito berangkat, kagek uwong betungguan. Kito ni yang harus nunggu, bukannyo pejabat plisi situ yang nunggu kito. Sebab, kito sekarang yang bekendak,” ujar Mang Oding samo Mang Juhai. ‘’Yo Ding, bentar lagi selesai, masih panas baju ini abis digosok ayuk kau. Kalo kagek tebakar badan kando kau ni, kapan langsung dipake,” jawab Mang Juhai.
Idak lamo, mereka langsung berangkat, menyusuri Jembatan Ampera. Namun, pas lewat Jalan Jenderal Sudirman, mereka yang nyubo nikungi macet, laju tejebak di tengah jalan. ‘’Nah ngapo macet ini kando, ado apo nian,” tanyo Mang Oding. ‘’Pecak macet nian Ding, kito nak minggir dak pacak lagi ini. Mano banyak truk kosong liwat, boleh apo truk masuk kota,” ungkap Mang Juhai.
‘’Oy kito ni tejebak macet nian kando, depan tu ado demo buruh. Nah lokak telambat kito kando, nak minggir dak pacak lagi,” jelas Mang Oding. Alhasil, sampe kawasan Cinde, mereka tambah tejebak macet. Pas betemu dengan plisi yang dikenalnyo, Mang Juhai langsung nanyo. ‘’Makmano ini kak, saro nak lewat,” tanyo Mang Juhai. ‘’Yo lur, susah nian, ditutupnyo nian jalan ni, pecak punyo dio bae,” kato plisi itu ngerutuki buruh bedemo nutup jalan.
Sekitar 15 menit tekurung dak pacak begerak, barulah rombongan demo itu, ngelanjutke perjalanan, setelah orasi di bundaran Cinde. ‘’Oi mano nak lewat kando, motor dan mobil pendemo ini besusun nian di jalan. Tepakso nunggu mereka liwat tulah kito baru pacak ngelanjut jalan,” terang Mang Oding. ‘’Sudahlah Ding, dak pacak lagi kito betemu pejabat plisi itu, sekarang la jam berapo pulok. Malangkelah Ding, gagal rencano kito,” ujar Mang Juhai.
‘’Nak diapoke lagi kando, segalonyo sudah tejadi. Kalo tau ado demo, lemak kito ngambek jalur lain bae tadi, idak akan tejebak macet mak ini,” sesal Mang Oding. ‘’Mak itulah kiro-kiro Ding. Badan bekeringat, haus, baju gosokan la kusam, gara-gara tejebak macet demo buruh ini. Cuma yo, mungkin mereka nak merjuangke nasibnyo nian, kito enjuk kesempatan,” tambah Mang Juhai. Hahaha, makonyo mang, jingok situasi, kalo lagi ado demo, cubo cari jalur lain, supayo idak tejebak macet. (sam)