MANG Juhai dan Mang Oding, melok prihatin dengan demokrasi di negeri ini. Sebab, ado caleg yang nyari duit dengan menghalalke segalo caro, demi menutupi biaya kampanye yang nganggap kurang cukup dengan duit puluhan juta. apo yang dilakuke caleg itu, hingga keduo sohib ini, baco bae cerito lengkapnyo.
Siang kemaren, pas nonton Tv, Mang Juhai dan Mang Oding, laju prihatin, jingok salah sikok caleg yang ditangkap polisi. Sebab, caleg itu, ruponyo ngerampok di Jawo sano. Mirisnyo, alasan caleg salah sikok partai Islam itu melakuke gawe kriminal itu, untuk nyari duit biaya kampanye. Kareno perbuatannyo, jelas bae, selain dak biso neruske rencano, dio jugo langsung dipenjaro.
‘’Nah makmano caleg sikok ini kando, miris nian ndengarnyo, sampe rela ngerampok untuk nyari duit biaya kampanye,” ujar Mang Oding mulai omongan. ‘’Yang pertamo, caleg ini nak jadi dewan, tapi katek duit. Yang keduo, biso dikatoke, kalo nak jadi caleg butuh duit banyak, bahkan kurang cukup Cuma puluhan juta. artinyo, mahal nian rego demokrasi di negeri kito ini sekarang,” simbat Mang Juhai.
‘’La jadi rahasio umum kando, kalo nak caleg itu, harus nyiapke duit raturan juta bahkan miliaran. Kapan dak katek duit sebanyak itu, la nasib nian kalo pacak jadi,” tutur Mang Oding. ‘’Wajar bae Ding butuh duit sebanyak itu. Kabarnyo, nak dapat nomor urut jadi itu, para caleg berebut bayar ke partai, rego nomor urut itu biso mencapai miliaran. Kemudian nak kampanye, butuh duit ratusan juta sampe miliaran jugo,” jawab Mang Juhai.
‘’Makonyo, kebanyakan uwong yang la jadi kagek, ado yang telibat korupsi,” ujar Mang Oding sambil senyum. ‘’Yang mak itu dak usah diomongi Ding, minimal mereka korupsi waktu. Kemudian, ado jugo yang korupsi duit nian, tapi idak seluruhnyo. Aku yakin masih banyak caleg atau dewan di Indonesia ini yang bagus dan jujur, Cuma persenannyo bae yang kito belum tau,” jelas Mang Juhai.
‘’Balek ke yang ngerampok ini, selain dak biso neruske pencalegannyo, dio jugo tepakso dipenjaro,” timpal Mang Oding. ‘’Yo itulah resiko bebuat kejahatan Ding, penjaro tulah hukumannyo, dak tu ditembak mati plisi. Bubar tulah rencano nak jadi caleg, kapan la meringkuk di penjaro mak itu,” tambah Mang Juhai. Hahaha, jadi mahal biaya nak jadi caleg tu kando yo. Wajar kando, kito beli baju dan buat baliho bae la berapo duitnyo, apolagi nak ‘ngebom’ pas pencoblosan kagek. (sam)