MANG Juhai dan Mang Oding yang lagi ngobrol rombongan di poskamling, tekejut. Sebab, ado dengar pengumuman lewat kampungnyo. Apo sebenarnyo yang tejadi, baco beritanyo dibawah ini.
Setiap sore, kalo katek gawean, Mang Juhai dan Mang Oding yang pengangguran berat ini, selalu nyempatke diri ngobrol di poskamling dekat rumahnyo. Biasonyo disano rame tetanggo kampungnyo, selain jago kampung. Lagi lemak ngobrol, tibo-tibo mereka dengar suaro dari toa pecak pengumuman itu, namun masih agak sayup-sayup. Tapi, lamo-lamo, suaro itu ndekat ke poskamling.
‘’Suaro apo nian itu Ding, pecak uwong BKKBN ngasih pengumuman dulu ye,” kelakar Mang Juhai samo Mang Oding, sambil senyum-senyum. ‘’Ay kando, lalamo nian cerito kamu tu. Sekarang ini kan bukan BKKBN lagi kando, tapi uwong Kominfo yang biasonyo galak buat pengumuman pake toa dan bemobil mak itu. Sikok lagi mobil Satlantas Polresta biasonyo,” jawab Mang Oding.
‘’Nah tapi arah pengumumannyo lain Ding, pecak ado uwong jual tiket pendaftaran. Ado apo nian ini Ding, cubo kau cari tau dulu,” sahut Mang Juhai agak serius. ‘’Yo jugo kando ye, tapi suaronyo tambah jelas, artinyo mobil atau kendaraan itu agak ndekati poskamling berarti kando,” tutur Mang Oding. Idak lamo, sampelah mobil pengumuman itu dekat poskamling.
Kapan dijingok mereka, ruponyo mobil itu punyo koran Palembang Pos, yang jualke tiket pendaftaran Jalan Sehat Palembang Pos Grup. ‘’Bapak-bapak, ibu-ibu, kakak-kakak, adik-adik, yang nak beli tiket pendaftaran Jalan Sehat Palembang Pos Grup dengan hadiah 4 mobil; 10 motor dan hadiah menarik lainnyo, silakan beli, sebelum tiketnyo habis. Sekarang jugo kami bawak tiket itu,” ujar seorang karyawan cewek pake baju Palembang Pos warno putih itu.
‘’Nah, pecaknyo dulur kito itu Ding, cubo dekati dulu,” ujar Mang Juhai samo Mang Oding. ‘’Oy kando, belilah tiket ini, ajak kawan-kawanmu di poskamling itu,” tegur karyawan cewek itu samo Mang Juhai dan Mang Oding. ‘’Yo dek, ini nah kawan kakak, pengusaha nak borong tiket kamu itu, untuk dibagike samo kami-kami ni,” jawab Mang Juhai, sambil ndekati mobil.
Alhasil, pengusaha itu langsung borong satu ball tiket pendaftaran atau sekitar 100 lembar. ‘’Bolehlah kamu ni dek, nekat nian Palembang Pos ini. Biarpun cewek galo, tapi semangatnyo ngalahi lanang galo. Temasuk usaha kamu jual tiket keliling kampung mak ini,” kato Mang Juhai. ‘’Yo mak inilah kando, namonyo jugo usaha. Sebab, tujuan kito bukan jualan tiketnyo kando, tapi pendekatan koran kito dengan masyarakatnyo,” ungkap karyawan cewek Palembang Pos itu.
‘’Mokasih kando, kami lanjut jalan yo,” timpal karyawan cewek jugo di mobil bagian tengah. ‘’Yo lur, semoga sukses acara Jalan Sehat Palembang Pos Grup-nyo yo. Yang jelas, kami pasti melok acara itu. Soalnyo, acaranyo, ketemu Pak Dahlan Iskan itu jugo tujuan kami, kareno kami ni anggota Relawan Dahlan Iskan (ReDI),” tambah Mang Juhai. Hahaha, berarti nak dimeriahkan dan diseriusi nian gawe Jalan Sehat Palembang Pos itu, kapan la berani keliling kampung mak itu mang. (sam)