MANG Juhai dan Mang Oding besiget keliling kotanyo, kareno nak ngejar idola barunyo. Bahkan, kareno pengen ketemu nian, tahan duo sohib kental ini, keluar masuk perguruan tinggi di kotanyo. Siapo idola barunyo itu, baco bae ceritonyo sampe tuntas.
Siang kemaren, Mang Juhai tekejut dengan status kawannyo, yang nunjukke fotonyo samo Jokowi disalah satu tempat di kotanyo. Kareno selamo ini memang ngefans Bapak Gubernur DKI Jakarta itu, Mang Juhai dan Mang Oding, langsung nyari tau dimano salah satu tokoh yang dikenal dengan gaya blusukannyo itu.
‘’Lur, dimano kau ketemu Bapak Jokowi itu. Aku galak jugo foto samo bapak itu. Dio tu, idola aku dulu, pas cagub DKI Jakarta, walaupun aku dak biso milih dio,” tanyo Mang Juhai samo kawannyo Triono, yang wartawan itu. ‘’Oh, bapak itu ado didepan rumah sakit itu kando, kareno ado pembukaan bank milik uwong Jakarta disano,” ungkap Triono melalui telepon dengan Mang Juhai.
Begegas Mang Juhai ngidupke motor bututnyo, sambil ngajak Mang Oding menuju pembukaan bank itu. Tapi sayang, begitu mereka sampe, ruponyo acara la selesai, bahkan Bapak Jokowi idolanyo, sudah pegi. ‘’Pak, maaf nak nanyo, Pak Jokowi-nyo la balek ke Jakarta apo,” tanyo Mang Juhai samo panitia diacara pembukaan bank itu. ‘’Oh belum Pak, dio menuju perguruan tinggi di seberang ulu sano,” jawab panitia itu.
Karuan bae, duo sohib kental ini, langsung menuju perguruan tinggi dimaksud, tujuan nak ketemu dan foto bareng Jokowi. Apes lagi bagi keduonyo, ruponyo uwong yang dicarinyo sudah pegi ninggalke perguruan tinggi itu. ‘’Nah, gara-gara macet simpang pamor tadi, laju belum ketemu kito dengan Pak Jokowi Ding,” rutuk Mang Juhai. ‘’Yo kando, kato dosen sini, Pak Jokowi la pegi ke perguruan tinggi di seberang ilir pulok,” jawab Mang Oding.
Kareno nak ketemu pecak uwong ngidam bae, laju mereka ngebut lagi dengan motor bututnyo, menuju perguruan tinggi di seberang ilir, dimano Jokowi ngasih kuliah umum. Namun, lagi-lagi mereka idak ketemu lagi, kareno selain Jokowi la pegi, peserta kuliah umum itu bae la bubar galo. ‘’Nah sial nian pecaknyo kito ni kando, idak ketemu nian dengan bapak itu,” kato Mang Oding.
‘’Yo Ding ye, ngapolah pacak mak itu,” sesal Mang Juhai. ‘’Ooh pantes kando, Jokowi kan takut tersaingi. Soalnyo badan kamu kan samo cak dio. Kapan kamu ketemu, laju kagek uwong salah ngajak foto. Niat nak foto samo Jokowi, laju teajak kamu fotonyo. Nah tebakarlah foto itu,” kelakar Mang Oding.
‘’Ay Ding, kau ini, pacak nian nak ngibur kando kau yang kesal idak pacak foto bareng Jokowi,” tambah Mang Juhai sambil senyum. Hahaha, laju demam Jokowi pulok pecaknyo kamu beduo ni Mang. Kapan kami, pepatah uwong nasib idak jauh dari rai, terkadang ado benarnyo jugo kando ye, untuk kamu beduo. (sam)