TRIONO, kawan Mang Juhai dan Mang Oding, dak pacak ngomong lagi, lantak gawe duo sohib kental itu. Soalnyo, walau sudah ditawari Triono yang wartawan itu, namun duo lanang maso puber keduo itu, masih milih ndaftar di koran grup sebelahnyo. Ngapo pacak mak itu ye, baco bae cerito lengkapnyo dibawah ini.
Siang kemaren, Mang Juhai dan Mang Oding, ngulang lagi ndatangi kantor Triono, kawannyo yang wartawan itu. Tujuannyo idak lain, kareno nak beli tiket pendaftaran Jalan Sehat Palembang Pos Grup itu, yang katonyo la nak abes. Setelah markir motor di parkiran koran itu, Mang Juhai dan Mang Oding bukannyo ke kantor Triono, tapi milih masuk ke kantor sebelahnyo, yang masih Grup koran Triono dewek.
‘’Oy kando, nak kemano kamu beduo tu. Pecaknyo lah idak bekawan lagi dengan kami ni,” panggil Triono sambil turun dari lantai duo kantornyo. ‘’Idak katek dindo, Cuma nak beli tiket pendaftaran Jalan Sehat Palembang Pos Grup, yang bakal ngadiri Pak Dahlan Iskan itulah,” jawab Mang Juhai. Begitu mendengat Triono langsung ngomong samo duo uwong itu. ‘’Nah kando, kalo nak beli tiket itu, cukup di kantor kito bae, ngapo nak ke sebelah nian,” kato Triono.
‘’Biaso bae dindo, jangan tesinggung,” timpal Mang Oding sambil senyum. ‘’Lantas, apo dio maksud kamu beduo nak ke sebelah nian itu kando,” tanyo Triono penasaran. ‘’Jadi kau nak tau nian apo alasannyo lur,” Mang Juhai balek betanyo samo Triono, yang terus nanyo itu. ‘’Iyolah kando, apo bedanyo, kamu beli disano dengan di kantor kito. Apolagi di kantor kito, kando banyak kenal dengan budak-budaknyo,” cecar Triono lagi.
‘’Bedanyo besak nian lur. Kalo di kantor kamu kan, yang jago tiket itu, banyaklah lanangnyo. Sementaro di kantor grup kamu sebelah sano, panitia-nyo cantik-cantik, mudo-mudo, fresh pulok, jadi semangat uwong beli. Sebab, pembeli lanang tu, biasonyo selain niat beli tiket, jugo jingok pelayanannyo lur,” jawab Mang Juhai sambil senyum-senyum. ‘’Caro kami ni lanang nak meranjak lah lur,” timpal Mang Oding lagi. Hahaha, jadi nak beli tiket, apo nak cuci mato, dengan jingok panitia cantik, kamu beduo tu mang. (sam)