MANG Juhai terpakso masuk acara kondangan cuma samo anaknyo Mac Dul bae, beberapo hari lalu. Apo sebabnyo; dan ngapo Bik Jubai idak masuk ke acara kawinan besannyo itu, baco bae ceritonyo sampe selesai.
Beberapo hari kemaren, Mang Juhai sekeluargo diajak besannyo untuk kondangan, kareno adek besannyo yang kawinan diluar kota. Mang Juhai sekeluargo idak lemak dak datang, kareno la disiapke mobil oleh besannyo itu, artinyo tinggal nyiapke badan bae. Pagi harinyo, mereka pun berangkat keluar kota, tempat calon adek ipar besannyo didaerah dusun sano.
Akan tetapi, kareno naek mobil itulah, Bik Jubai laju mabok dan muntah-muntah. Bahkan, muntahnya selain nyembur di mobil, jugo belepotan di baju kondangan yang dipake Bik Jubai. Alhasil sampe tempat acara disano, besannyo sekeluargo sudah turun dari mobil, namun Bik Jubai masih teseler di kursi mobil, sambil matonyo mejam.
‘’Dek, kito nak kondangan idak, masuk ke acara itu kito, uwong la turun galo,” ujar Mang Juhai samo Bik Jubai, yang tejingok lemas, usai muntah-muntah. ‘’Kakak samo Mac Dul bae masuk ke acara kawenan itu yo, aku idak pacak, kareno badan aku masih lemas kak,” jawab Bik Jubai yang masih terus mejamke matonyo itu.
‘’Nah dak lemak kalo mak itu dek, dak apo-apo kito masuk, kagek kakak pegangi bae,” tutur Mang Juhai. ‘’Lemas nian kak badan aku, kamu beduo baelah masuk, biarlah aku istirahat di mobil inilah yo. Selain lemas, kakak dak jingok apo, baju aku la keno muntah galo ini. Madaki baju kotor dan basah, malu dijingok uwong rame disano kak,” ungkap Bik Jubai.
Setelah jingok baju Bik Jubai yang belepotan mak itu, barulah Mang Juhai ngerti, ngapo bininyo itu idak galak masuk ke acara kawenan besan mereka. ‘’Yo sudah kalo mak itu, kami bae masuk. Tapi, adek idak apo-apo ditinggal dewekan di mobil,” kata Mang Juhai. ‘’Yo dak apo-apo kak, siapke bae banyu minum dan cemilan yang dibawak itu, biar aku pacak ngisi perut,” tambah Bik Jubai. Hahaha, laju bukannyo kondangan kamu tu Bik, gara-gara mabok bik yo, tepakso istirahat di mobil bae seharian, nunggu uwong balek acara. (sam)