MANG Juhai dan Mang Oding, nyaris bae keno tilang plisi dikawasan Cinde, kemaren. Soalnyo tau dewek, selain motornya la mati pajak, terus SIM C Mang Juhai jugo la mati. Makmano mereka biso selamat dari razia itu, berikut cerito duo sohib kental ini.
Pagi kemaren, Mang Juhai dan Mang Oding, berencano betamu ke rumah Mang Benu, yang ado dikawasan Km 7. Dengan motor butut andalan, keduo lanang ini, bergegas menyeberang Ampera. Nah, sampe depan IP, mereka bingung, ngapo pecak ado uwong rame dikawasan depan Cinde.
‘’Nah ado apo dio itu Ding, ngapo uwong pecak rame nian ini, plisi jugo tejingok bejibun, uwong lantas galo. Apo ado kecelakaan Ding yo,” tanyo Mang Juhai. ‘’Berentikelah dulu motor kando, kalo kagek uwong demo. Baru berapo hari kemaren kan, kamu tejebak macet didepan Cinde, gara-gara ado uwong demo,” kato Mang Oding.
‘’Tapi kalo uwong demo, pasti ado suaro orasinyo Ding, ini sepi,” tutur Mang Juhai lagi. ‘’Kalo mak itu, biar aku ngecek dulu kando dengan jalan kaki. Kamu berentilah dulu disini yo. Itung-itung untuk olahraga pagi bae kando,” ungkap Mang Oding. ‘’Yo sudah, jalanlah dulu kesano, cek dulu Ding, ado apo nian,” tukas Mang Juhai.
La agak dekat Cinde, Mang Oding baru tahu kalo rame itu, bukannyo kecelakaan atau uwong demo, tapi ado razia plisi lalulintas. Begitu balek ke dekat Mang Juhai, Mang Oding langsung ngomongi itu. ‘’Razia lantas kando, pecaknyo sebesakan nian. Kabarnyo la banyak yang terjaring,” terus Mang Oding.
Dengar itu, Mang Juhai langsung nelepon kawannyo yang wartawan itu Triono. ‘’Ado razia lantas dindo yo,” tanyo Mang Juhai. ‘’Yo kando, razia besak-besakan nian ini, Operasi Zebra namonyo. Kalo memang surat dak lengkap, dan katek SIM, lemaklah ngindar kando. Saro kamu nak ngurusnyo disini,” jawab Triono sambil senyum.
‘’Yo sudah, mokasih yo, sekedar nak mastikennyo bae dindo,” ujar Mang Juhai sambil nutup teleponnyo. ‘’Nah, lemak ngambek jalan lain bae kito Ding, Operasi Zebra itu, memang razia besak-besakan, bahkan ado sidang di tempat,” tutur Mang Juhai samo Mang Oding. ‘’Yo sudah, ngindari balak kando, lemak kito lewat jalan laen bae,” tambah Mang Juhai. Hahaha, makonyo surat-surat kendaraan dan SIM tu harus lengkap Mang, kalo nak mbawak kendaraan, supayo idak takut dengan razia. (sam)