MANG Juhai dan Mang Oding, memang la kejingokan berubah nian sekarang ini. Sebab, mereka beduo jugo mendukung mahasiswa yang demo masalah adonyo pekan kondom di Indonesia itu. Berikut cerito lengkapnyo.
Begitu mbaco koran pagi-pagi, Mang Juhai dan Mang Oding langsung tetutu dengan berita demo pekan kondom. ‘’Nah ini yang katek aguk tu Ding, madaki buat pekan kondom. Katek moral dan adab nian lagi bangso kito, kalo digalakke barang mak ini Ding,” ujar Mang Juhai memulai omongan di teras rumahnyo samo Mang Oding.
‘’Yo nian apo kando,” simbat Mang Oding sambil senyum-senyum. ‘’La serius aku Ding, negara kito nak jadi apo, kalo seks bebas dilegalke, jelas moral dan adab bangso kito turun nian Ding. Pokoknyo kapan la nak dibuat pekan kondom mak itu, biso bae ujungnyo kagek melegalke seks bebas dan judi. Nah ancur negara kito Ding kalo mak itu,” tutur Mang Juhai tejingok serius.
‘’Pendapat kando itu setelah tobat sekarang kan. Cubo kalo dulu, lagi jayonyo, pasti setuju dengan pekan kondom ini, caro banyak mama mudo. Tapi sekarang berarti la nak ngajak berenti nian gawe dak keruan itu, setuju aku dengan penolakan yang mak itu kando,” jawab Mang Oding. ‘’Neh kau ini, ngapo nak ngingat masa lalu itu Ding,” ujar Mang Juhai.
‘’Sekadar untuk kilas balik kando, biar kito tambah kuat untuk betobatnyo,” kato Mang Oding. ‘’Yo boleh, tapi jangan semangat dan kuat-kuat nian beceritonyo, kagek dengar ayuk kau, laju perang dunio ketigo pagi ini,” kato Mang Juhai sambil narukke jari telunjuk di mulutnyo, sebagai tando biar Mang Oding idak basing ngomong.
‘’Ngerti aku kando, sudahlah, pokoknyo kito sepakat pekan kondom itu dihapuske di Indonesia ini. Apo kito harus melok demo nian, untuk ndukung mahasiswa nolak pekan kondom itu kando,” kelakar Mang Oding. ‘’Kuraso sementaro ini idak perlu melok demo Ding, yang penting kito idak setuju, itu bae dulu,” jelas Mang Juhai. Hahaha, alhamdulillah kalo la betobat dan jauhi maksiat Mang, berarti la menuju syurgo nian kamu tu, kami dukung Mang. (sam)