GARA-gara Bik Jubai nak kondangan keluar kota, laju Mang Juhai dak pacak keluar rumah, hampir seharian. Ngapo laju mak itu Mang, simak bae ceritonyo sampe selesai.
Kemaren, Mang Juhai hampir seharian mendap di rumahnyo. Soalnyo, dari pagi bininyo yang super cerewet Bik Jubai, sudah ngilang dari rumah. ‘’Kak, adek pegi dulu ye. Jangan lupo, kakak tu jagoi Mac Dul di rumah. Awas kalo sampe idak teurus dengan anak bujang kito ini,” ujar Bik Jubai samo Mang Juhai, yang masih ngorok di kasur.
‘’Iyo dek, lajulah nak pegi kondangan. Jangan lupo sampeke salam kakak, dengan keluargo besan itu, kalo kakak dak biso melok kondangan, kareno nak ado gawean,” jawab Mang Juhai, sambil ngucek matonyo, kareno baru tebangun. ‘’Kagek disampeke kak. Kalo memang nak ado gawe kato kakak tu, ajak bae Mac Dul pegi, idak apo-apo kak, sekalian ngajak dio jalan,” kato Bik Jubai.
‘’Kunci ke bae lagi pintu rumah dek, kakak masih nak tidok dulu, baru jam 6 pagi ini,” kato Mang Juhai sambil narik selimut, ngelanjuti buat peta di bantalnyo. ‘’Iyo kak,” tutur Bik Jubai sambil nutupi pintu kamar, terus ngunci pintu rumah dari luar. Alhasil hampir seharian Mang Juhai idak keluar rumah, sehinggo kawan akrabnyo Mang Oding curiga.
‘’Assalamu’alaikum, kando, ado di rumah apo,” ujar Mang Oding sambil ngetuk pintu rumah Mang Juhai, saat waktu hampir jam 3 sore. ‘’Wa’alaikumsalam, tunggu bentar, masuk Ding,” sahut Mang Juhai dari dalam rumah. Pas pintu dibuka, Mang Oding, langsung nyerang dengan berbagai pertanyoan samo Mang Juhai.
‘’Ado apo nian, laju dak keluar seharian ini kando. Katonyo nak ngajak ke BKB, melok ngurusi persiapan Jalan Sehat Palembang Pos Grup itu. Tapi ditunggu dari pagi, idak metu-metu. Makonyo aku ke rumah kamu ni, kalo kagek badan kamu la beku, nafas katek lagi. Caro curigalah kando,” ucap Mang Juhai.
‘’Oy masih idup aku ni Ding. Idak keluar rumah, kareno disuruh ngasuh ponakan kau Mac Dul ini nah. Sebab, ayuk kau dari pagi tadi, melok besan kondangan keluar kota. Mac Dul dak diajak, takut kagek mabok, kareno jalannyo hampir 3 jam naik mobil,” jelas Mang Juhai. ‘’Ooh mak itu, yo sudah, kito ajak bae Mac Dul kesano, sekalian dio nak jalan-jalan,” kato Mang Oding.
‘’Makmano yo Ding, apo kito nunggu ayuk kau balek bentar lagi bae, kan kito biso bebas jalan beduo,” tutur Mang Juhai. ‘’Mak ini bae kando, kalo kamu malu samo Mac Dul, biar aku yang ngasuhnyo di BKB kagek. Jika perlu, kamu omongi bae Mac Dul anak aku, kalo kamu masih nak ngaku bujang nian,” kelakar Mang Oding. ‘’Ai kau ni Ding, nak makso nian ke BKB. Payolah kalo mak itu, kita ajak Mac Dul,” tambah Mang Juhai. Hahaha, ngapo nak malu ngajak anak Mang, sejagat ini uwong la tau, kalo kamu tu la bebini dan punyo anak. (sam)