MANG Juhai dan Mang Oding, kular-kilir bae pas acara Jalan Sehat Palembang Pos Grup kemaren. Soalnyo, selain jingok uwong menyemut, jugo kareno memang diduga uwong duo ini ado kendak lain. Apo tujuan lainnyo duo sohib kental ini, baco bae ceritonyo sampe habis.
Sudah solat subuh, Mang Juhai dan Mang Oding sudah keluar rumah. Maklumlah, duo kawan kental ini, idak galak ketinggalan melok Jalan Sehat Palembang Pos Grup yang diadoke di BKB. Tujuan utamo mereka, selain nak nyari doorprise, jugo nak ngejoke foto besamo dengan idolanyo Bapak Dahlan Iskan, yang memang mandu senam sehat yang lebih dikenal dengan istilah Senam Sehat DI Style.
‘’Dek, kakak pegi dulu ye, nak disalamke idak dengan Bapak Dahlan Iskan,” kato Mang Juhai samo bininyo yang super cerewet itu Bik Jubai. ‘’Yo kak, semoga bawak hadiah baleknyo kagek ye,” jawab Bik Jubai, sambil nuju dapur, nak bemasak. Setelah manaske mesin motor bututnyo, Mang Juhai langsung pegi jemput Mang Oding di rumahnyo.
‘’Ding, siap belum, payo berangkat kito, mumpung pagi, pacak ado kesempatan foto bareng Pak Dahlan Iskan,” jerit Mang Juhai dari depan rumah Mang Oding. ‘’Iyo kando, ini lah siap, berangkat kito,” jawab Mang Oding, sambil masangke sepatu kets merk DI ini. Becepat duo kawan akrab ini ke BKB. Setelah markirke motor, mereka beduo langsung tegak depan tanggo panggung acara di BKB.
Alhasil, selain biso foto bareng setelah nyegat Pak Dahlan Iskan datang, mereka jugo langsung melok senam dipandu idolanyo yang Meneg BUMN tersebut. setelah badan segar, keduonyo jugo melok jalan sehat. Nah pas sampe BKB lagi, mereka bukannyo duduk, tapi langsung kular-kilir di acara itu.
‘’Alangkah rame pesertanyo Ding, mati aku, baru kali ini peserta Jalan Sehat uwongnyo menyemut. Bolehlah Palembang Pos Grup dan Pak Dahlan, besak nian pengaruhnyo ini,” kato Mang Juhai sambil ngajak Mang Oding jalan. ‘’Yo nian kando, bagus nian pulok acaranyo ini. Sukses nian acaranyo kalo mak ini, rugi nian sponsor idak melok partisipasi kando,” ujar Mang Oding.
Sudah dua kali kular-kilir dan saro lewat, Mang Juhai masih bae nak ngajak jalan. ‘’Oy kando, kito lewat bae saro, malah kamu nak ngajak jalan terus,” ucap Mang Oding. ‘’Lemak Ding, segar nian badan aku, abes senam dan jalan sehat, idak teraso capek,” kato Mang Juhai. ‘’Sudahlah kando, la tetebak aku dengan gawe kamu tu, kumat lagi pecaknyo penyakit, nyari kesempatan dalam kesempitan itu,” kelakar Mang Oding.
‘’Maksud kau apo Ding,” tanyo Mang Juhai. ‘’Kamu tuh nak nyari gesekan kando, mentang banyak betino pakaian olahraga dan seksi diacara ini. Tambah dengan uwong rame, saro lewat, jadi idak ketahuan nak mbuat duso,” jelas Mang Oding. ‘’Ay kau ini Ding, baseng bae. Idak oi, Cuma semangat bae, jingok uwong rame mak ini,” tambah Mang Juhai sambil senyum-senyum. Hahaha, berentilah mang, katonyo nak tobat nian, ngapo masih gawe dak keruan mak itu, nyari gesekan, hehehe. (sam)