MANG Juhai dan Mang Oding, laju keno tegur Pak RT di kampungnyo malam kemaren. Ngapo keduo sohib kental itu laju keno tegur, baco bae ceritonyo dibawah ini sampe tuntas.
Beberapo hari lalu, Mang Juhai dan Mang Oding, selain dak sempat solat maghrib di Masjid, pagi besoknyo jugo langsung berangkat keluar kota, diajak oleh Mang Benu. Kareno itu, sedari pagi, duo kawan akrab ini, sudah ninggalke rumahnyo. Alhasil pagi yang samo, ruponyo sudah ado jadwal gotong-royong di kampung itu, untuk bersihke jalan dan parit.
Kareno pertamo idak tahu dengan kegiatan itu, sebab idak melok rapat di masjid; keduo berangkat keluar kota, jadi keduonyo idak melok kegiatan di kampungnyo itu. Sore harinyo, pas balek ke rumah, Mang Juhai dan Mang Oding, jingok tetanggonyo dan Pak RT agak cuek dengan mereka. Namun saat itu, mereka nganggap biaso bae, mungkin lagi ngelamun galo di pos ronda itu.
Nah, mereka beduo baru tahu keno marah, setelah ado rapat di masjidnyo, selesai solat maghrib. Jingok ado Mang Juhai dan Mang Oding solat, Pak RT di kampungnyo, langsung ngajak warga dan tokoh masyarakat lainnyo, rapat mendadak di masjid tempat mereka biaso kumpul atau rapat.
‘’Seluruh warga dan tokoh masyarakat, aku minta jangan balek dulu, sebab kito rapat,” ujar Pak RT yang ngumumke rapat pake micropon masjid nian itu. Setelah seluruh uwong ndekat dan kumpul galo, Pak RT langsung ngomong agenda rapatnyo yang macam-macam. Terakhir dio ngajak mbahas masalah gotong-royong paginyo.
‘’Nah untuk gotong-royong pagi tadi, rasonyo Cuma Mang Juhai dan Mang Oding yang idak melok. Ado apo, mungkin kito perlu minta penjelasannyo, sebelum kito mutuske sanksi untuk mereka,” kato Pak RT. Ndengar namonyo disebut, duo sohib itu langsung tekejut. ‘’Memang ado gotong-royong Pak RT yo pagi tadi,” tanyo Mang Juhai.
‘’Iyo, kamu beduo ngapo dak datang, kan sudah diumumke di masjid malam sebelumnyo,” cecar Pak RT. ‘’Maaf Pak RT, kami diajak kawan keluar kota, jadi idak biso melok gotong-royong. Keduo, kami idak tahu pengumuman itu, kareno idak melok solat maghrib malam sebelumnyo,” jelas Mang Oding. ‘’Kami pengen kamu beduo tu peduli dengan kampung kito, itu bae, bukan kami benci dengan kamu ye,” timpal tokoh masyarakat disano.
‘’Iyo Pak RT dan lainnya, kami ngaku salah kalo mak itu. Sekarang, kami pun siap nerimo sanksi apo bae dari Pak RT dan warga lainnyo yo,” kato Mang Juhai tejingok nyesal dengan ketidakhadirannyo di acara Gotong-royong itu. ‘’Yo sudah, sanksinyo, kamu beduo belike rokok dan gorengan untuk budak jago kampung malam ini bae,” tutur Pak RT.
‘’Yo pak, kami terimo sanksi itu,” tambah Mang Juhai dan Mang Oding, njawab barengan. Hahaha, makonyo Mang, kito harus peduli dengan kampung kito dewek, termasuk kegiatan gotong-royong mak itu, kareno banyak manfaatnyo. (sam)