MANG Juhai dan Mang Oding agak prihatin dengan ulah oknum pejabat di provinsinyo ini. Sebab apo, ado dugaan pejabat dan caleg ribut, diduga dipicu masalah politik; dan jugo masalah narkoba. Ngapo pacak mak itu ye, baco bae ceritonyo dibawah ini.
Begitu baco koran pagi kemaren, Mang Juhai dan Mang Oding, tekejut nian. Soalnyo, ado berita di halaman depan koran, nyebutke kalau ado pejabat ribut saat pelantikan salah seorang Bupati di provinsinyo. ‘’Nah, ngapo pacak mak ini Ding, awak pejabat galo, tapi tingkahnyo pecak preman jalanan ini,” sesal Mang Juhai.
‘’Iyo kando ye, ngapolah laju nak ribut. Seharusnyo kapan la jadi uwong besak tuh, harus pintar ngontrol emosi, bukan nunjukke diri pecak uwong idak bependidikan mak itu,” ujar Mang Oding. ‘’Benar nian kato kau tu Ding, rusak negara kito, kalo pejabat-pejabat dak pacak ngontrol emosi mak ini. Kalo kagek kapan diprotes rakyatnyo, laju nak ngoco pulok,” timpal Mang Juhai.
‘’Sebenarnyo, kalo dari kawan-kawan, duo pejabat itu tuh bagus kesehariannyo kando, idak katek yang idak bependidikan, sarjana galo mereka itu. Makonyo aku heran, ngapo jadi mak itu ye,” terang Mang Oding. ‘’Ini namonyo buat malu Ding. Ribut pulok ditengah pejabat lain, bahkan ado menteri pulok katonyo disano; termasuk di belakang rumah dinas bupati yang nak pelantikan kejadiannyo,” tutur Mang Juhai.
‘’Kiro-kiro apo masalahnyo itu kando, sampe betegangan urat leher itu,” kelakar Mang Oding. ‘’Idak pasti penyebabnyo Ding. Tapi kalo di koran ni disebutke, dugaan keributan dipicu masalah politik di provinsi kito; termasuk masalah caleg itu nuduh pejabat lawannyo ribut narkoba. Tapi yo, idak tau kebenarannyo Ding, pokoknyo Cuma mereka tulah yang tau,” jelas Mang Juhai.
‘’Sudahlah kando, kito bedoa bae semoga mereka cepat bedamai, idak manjangke masalah. daripado beribut, lemak berjuang samo-samo untuk kesejahteraan rakyat dipimpinnyo, didunio lemak, akhirat jugo insya allah bakal lemak kando,” ungkap Mang Oding. ‘’Benar kato kau tuh Ding, pikirke rakyatnyo bae, supayo sejahtera galo, daripado beribut mak itu,” tambah Mang Juhai. Hahaha, benar itu mang, dak usah beribut, tunjukke kalo kito tu pejabat, jangan pecak preman jalanan mak itu, kalo memang ado ribut nian. Kalo idak katek ributnyo, baguslah, berarti isu bae. (sam)