DUO sohib kental, Mang Juhai dan Mang Oding, Cuma pacak geleng-geleng palak bae, dengar cerito Mang Benu, kawan lamo mereka, yang banyak bebisnis di luar kota. Ngapo keduonyo pacak mak itu, baco bae ceritonyo dibawah ini.
Saat acara Jalan Sehat Palembang Pos Grup kemaren, Mang Juhai dan Mang Oding, ketemu dengan kawan lamo mereka yang tauke itu, Mang Benu. Karuan bae, kareno meloki bos, duo kawan pecak pinang dibelah duo ini, langsung ditraktir sarapan pagi oleh Mang Benu. ‘’Kando, sarapan dulu kito, biar lemak bejalan di BKB ini,” kato Mang Benu.
‘’Setelah jalan dan senam samo Pak Dahlan, memang lemak nian ngisi perut ni lur,” kato Mang Juhai. ‘’Idak akan nolah lur kami, kalo diajak lemak mak ini,” timpal Mang Oding. Usai makan, Mang Benu entah ngapo, laju becerito, kalo dio idak balek ke rumahnyo di Palembang, malah nyewo tigo kamar hotel, untuk istirahat. ‘’Aku ni nyewo tigo kamar hotel kando, untuk istirahat,” ujar Mang Benu.
‘’Siapo nak nidokennyo Benu, alangkah banyak nyewo kamar tu. Sikok hotel atau lain-lain,” tanyo Mang Juhai. ‘’Benar kando, nyewo tigo kamar hotel di tigo hotel berbeda. Biasolah kando, caro anak mudo,” jelas Mang Benu. ‘’Jadi siapo bae yang tidok di kamar hotel itu, dak mungkin badan kamu dibelah tigo lur,” celetuk Mang Oding sambil senyum.
‘’Itulah hebatnyo lur, sikok untuk kito nian, kareno ado acara organisasi; sikok lagi untuk anak bini; sedangkan sikok lagi untuk mama mudo kando,” ungkap Mang Benu agak malu-malu. ‘’Ooh, jadi kau ini belum tobat jugo Benu yo. Aku pikir kau la melok kami betobat, ruponyo masih pecak lamo tulah, malah tambah hebat sekarang,” tutur Mang Juhai.
‘’Beguyur bae kando, caro badan masih mudo, duit lagi megang. Namonyo lokak lemak, kagek dulu ninggalkennyo kando,” jawab Mang Benu. ‘’Aku minta kau betobat Benu yo, sebelum telambat. Kalo nafas la megap-megap, katek guno lagi nak betobat Benu. Mumpung masih sehat, pacak usaha perbaiki kehidupan yang lurus sesuai ajaran agama tu,” tegas Mang Juhai. ‘’Yo kando, kagek aku betobat kalo mak itu,” tambah Mang Benu. Hahaha, caro uwong lagi ngubek duit mang, wajar bae nyewo sampe tigo kamar di tigo hotel berbeda, kareno kebutuhannyo masing-masing. (sam)