SETELAH betahun-tahun idak masuk tempat hiburan malam, akhirnyo Mang Juhai dan Mang Oding ngalah samo kawannyo Mang Benu. Sebab, Benu nyuruh mereka datang ke salah sikok tempat hiburan itu, alasan dio ulang tahun. Apo yang tejadi disano, simak bae ceritonyo dibawah ini.
Malam kemaren, Mang Juhai dan Mang Oding, dengan motor butut andalannyo, ngonyor ke tempat hiburan malam tekenal di daerah Kemuning. Mereka idak lemak kalo idak datang, kareno kawan mereka Mang Benu, sedang ngareyoke ulang tahun. ‘’Nah, masuk kando, selamat datang,” teriak Mang Benu, begitu duo sohib kental itu bukake pintu ruangan karaoke.
‘’Hehehe, biaso bae Benu. Lanjutlah kalo nak nyanyi, dak usah teganggu nian dengan kehadiran kami,” ujar Mang Juhai. ‘’Yo nian Benu, tanggapi biaso bae, bukan pejabat kami ni pecak nak minta dihormati nian,” timpal Mang Oding. ‘’Yo sudah kalo mak itu, nak pesan apo lajulah kando. Nak pesan minuman, rokok, apo betino ngerewangi nyanyi, bebas malam ini, aku yang bayar,” kato Mang Benu.
‘’Basing bae kau ni Benu, yo sudah kami pesan sprite dan aqua bae dek yo. Jangan lupo rokok sebungkus sewang,” jelas Mang Juhai samo pelayan karaoke disano. ‘’Oy kando, madaki tempat hiburan pesan mak itu. Kalo nak minum banyu putih, di rumah bae kando, gratis,” tutur Mang Benu sambil ngakak ketawo.
‘’Dak usah ngajak rusak lagi Benu ye, kami nak tobat nian, bukan ecak-ecak ye. Untung kami masih menghormati kau, galak datang kesini,” jelas Mang Oding sambil senyum-senyum. ‘’Yo sudah kalo mak itu, aku terimo kasih,” ungkap Mang Benu.
Setelah beberapo jam nyanyi; dan memang la nak balek, Hp Mang Juhai bebunyi. Kapan dijingoknyo yang nelepon Bik Jubai. ‘’Dak usah diangkat dulu telepon ini, bahayo ini,” gumam Mang Juhai dalam ati. Idak lamo, benar nian, dio samo Mang Oding yang sudah pamit balek, sudah ado di parkiran motor. Alhasil begitu teleponnyo bebunyi lagi, langsung diangkat Mang Juhai, tapi sambil ngidupke motor.
‘’Sudah dimano kak, katonyo keluar bentar bae samo Oding,” tanyo Bik Jubai melalui telepon. ‘’Yo bentar dek, Cuma ngobrolnyo lamo. Ini lagi di jalan, nak balek samo Oding,” jawab Mang Juhai, sambil narik gas motor, pecak la di jalanan nian. ‘’Yo sudah kalo mak itu, ati-ati bae kak ye,” tambah Bik Jubai sambil nutup telepon. Hahaha, bolehlah, ilmu lamo masih jalan mang ye, njawab telepon Bik Jubai sambil narik gas motor. Hehehe. (sam)