MANG Juhai dan Bik Jubai, laju dak kelemakan dewek, kareno ditegur oleh penumpang lain di mobil travel yang di naikinyo dari dusun nak balek ke Palembang. Ngapo laki bini ini pacak keno tegur, baco bae ceritonyo dibawah ini.
Kareno ado keluargonyo yang meninggal di dusun Mang Juhai, laju Mang Juhai samo bininyo yang super cerewet itu, mau dak mau mudik. Itu tadi, kareno katek kendaraan dewek, tepakso laki bini ini, numpang travel untuk mudik ke dusun Mang Juhai itu. Setelah nguburke dan nginap semalam di dusun, besok harinyo, mereka pamit balek dengan keluargonyo.
Alhasil, caro di dusun, banyak dulur Mang Juhai ngenjuk makanan untuk dibawak ke Palembang, mulai dari tempoyak baru; pedo ikan; sampe jamur, yang memang lagi banyak di dusunnyo. Begitu travel nak ke Palembang njemput, Mang Juhai langsung narok kardus berisi tempoyak dan lainnyo itu di bagasi belakang travel. Pertamonyo memang katek bauk barang-barang itu.
Tapi setelah bejalan beberapo menit, bauk tempoyak Mang Juhai tadi nyengat nian, ditambah mobil travel pake AC, laju tambah jadi. Karuan bae, penumpang lain, langsung protes. ‘’Oy mang, apo yang kamu bawak itu, tempoyak yo. Bauk nian mang, sampe nak mabok aku di mobil ini,” protes salah sikok penumpang betino di mobil travel itu. ‘’Iyo buk, memang tempoyak,” jawab Mang Juhai sambil senyum malu.
‘’Yo Pak sopir, bauk nian tempoyak mamang ini, aku jugo nak mabok jugo. Matike bae AC nyo, kito bukak kaco mobil, biar bauknyo bekurang. Kalo dak tu, buang bae tempoyak itu,” celetuk penumpang lanang lainnyo. ‘’Jangan dibuang Pak, sayang, kan barang dikasih uwong. Kito cari solusi lain bae kalo mak itu, biar katek yang dirugike,” terang Mang Juhai dengan rai mulai merah kareno tesinggung dengar tempoyaknyo nak dibuang.
‘’Mak ini bae, Pak sopir ado lap mobil sambil kantong asoy idak,” timpal Bik Jubai. ‘’Ado bik, untuk apo,” jawab sopir travel itu. ‘’Kalo mak itu, kito berenti dulu. Bongkar tempoyak itu, biar dibungkus asoy, terus bungkus lap mobil tadi, lalu bungkus asoy lagi sampe berapo lapis, biar bauk tempoyaknyo ilang,” ungkap Bik Jubai. ‘’Benar nian itu bik, itulah caro biar bauk tempoyaknyo idak nyengat,” sahut penumpang lain lagi di mobil itu.
Ternyata ide Bik Jubai sangat tepat, dengan membungkus asoy, lalu bungkus lap mobil, dan kembali dibungkus asoy. Soalnyo, bauk tempoyak dalam gelok bawakan mereka idak nyengat, bahkan idak tecium lagi oleh penumpang. ‘’Nah kalo mak ini, berarti aku tarik ucapan aku nyuruh buang tempoyak itu mang. Jalanan kito ke Palembang idak teganggu lagi,” kato penumpang sebelumnyo yang sempat nyuruh buang tempoyak itu.
‘’Yo jugo itu mang, ide bini kamu tu tepat nian, ternyato mak itu ngilangke bauk tempoyak di mobil yo. Siapo tau aku nak bawak pulok kagek, berarti la tau caronyo. Ado hikmah galo dari kejadian ini,” tutur penumpang ibu-ibu protes pertamo kali tadi. ‘’Samo-samo bapak itu, kami jugo minta maaf kalo sempat buat kamu idak nyaman di travel ini. Ini keteledoran kami, kareno nerimo kardus bae dari sanak di dusun sano,” tambah Mang Juhai. Hahaha, kamu beduo pulok mang, bawak tempoyak tu harus dibungkus bagus-bagus, biar idak bauk di mobil. (sam)