MANG Benu nyaris urung nak betamu ke rumah Mang Juhai sore kemaren. Ngapo pacak mak itu mang, baco bae beritanyo dibawah ini.
Siang kemaren, Mang Benu nelepon Mang Juhai kalo dio nak maen ke rumah. ‘’Kando, kebetulan aku lagi di Palembang, jadi rencanonyo nak maen ke rumah kamu sore kagek. Kamu ado di rumah idak kando,” tanyo Mang Benu melalui telepon. ‘’Maen bae Benu, kando kau ado di rumah sore kagek,” jawab Mang Juhai.
Alhasil sekitar jam 3 sore, Mang Benu tepakso mbawak mobil nak maen ke rumah Mang Juhai. Soalnyo, kalo bawak motor pacak basah kuyup, lantak ujan deras mak itu. Namun, begitu nak masuk lorong rumah Mang Juhai, Mang Benu tekejut, kareno jalanannyo banjir. Tepakso Mang Benu nelepon Mang Juhai dari mobilnyo.
‘’Ai kando, alangkah tinggi banyu di jalan Lorong rumah kamu ini, banjir yo,” kato Mang Benu yang ngulangi lagi nelepon Mang Juhai. ‘’Yo nian Benu, banjir. Sebab, selain banyu ujan tegenang, jugo depan rumah ni keno pasang,” jawab Mang Juhai. ‘’Ngapo pacak mak itu kando, perasaan jauh dari Sungai Musi rumah kamu tu,” tanyo Mang Benu.
‘’Memang dari Sungai Musi jauh Benu, tapi pasangnyo kareno ado anak sungai di bagian belakang lorong kito. Jadi mano musim pasang surut, jugo lantak ujan deras mak ini, makonyo banjir,” terang Mang Juhai. ‘’Jadi makmano ini kando, ngeri aku nak mbawak mobil sampe depan rumah kamu, kalo kagek mogok pulok,” tutur Mang Benu.
‘’Yo sudah kalo kiro-kiro kau ragu, aku susul kau ke depan lorong pake motor. Kito titip bae mobil kau di rumah kawan aku depan sano, terus kito ke rumah bemotor bae,” ungkap Mang Juhai. Idak sampe limo menit, Mang Juhai sudah nemui Mang Benu depan lorong rumahnyo, mbawak motor lengkap dengan jas ujan.
‘’Titiplah di pekarangan rumah kawan aku itu, aman bae mobil kau Benu,” kato Mang Juhai. Namun, begitu dekat rumah Mang Juhai, Mang Benu ngeri naik motor, kareno banjir tadi. ‘’Tinggi idak banyunyo kando,” tanyo Mang Benu lagi. ‘’Idak tinggi nian lur, Cuma sebatas mato kaki. Tenang bae, idak akan masuk lubang, kando kau la paham dengan jalan ini,” ujar Mang Juhai.
‘’Nah kalo dak pulok tinggi nian, lajulah kamu bemotor, aku turun disini dan jalan bae kando,” tukas Mang Benu. ‘’Yo sudah kalo kau masih ragu, bejalanlah ke rumah, aku bemotor bae duluan yo. La dekat pulok memang,” tambah Mang Juhai. Hahaha, cocok nian mang ye, mano ujan deras, jugo pasang sungai, laju banjir depan rumah kamu. nyaris bae Mang Benu urung maen ke rumah, gara-gara banjir. (sam)