MANG Juhai dan Mang Oding, laju ngakak dak berenti, kareno ngolahke kawannyo yang wartawan itu, Triono. Apo omongan Mang Juhai sampe mereka ketawo dengan Mang Oding, baco bae ceritonyo dibawah ini.
Setelah lamo dak ketemu, akhirnya Mang Juhai dan Mang Oding, puas ngobrol dengan kawannyo yang wartawan itu, Triono, di rumah Mang Juhai. Kareno memang la akrab, dikawani kopi dan gorengan, ketigonyo ngobrol ngalur-ngidul. Terakhir, bahasan mereka tentang gaji di kantor Triono, yang katonyo sudah sesuai Upah Minimum Provinsi (UMP).
‘’Yo kando, kantor kami ni, rencanonyo mulai tahun ini, nak mberlakuke gaji untuk karyawan, sesuai dengan UMP. Mudah-mudahan bae ado perbaikan idup untuk kito ke depan kando,” ujar Triono. ‘’Nah, bahayo itu lur, bukannyo senang harusnyo kamu tu. Soalnyo, kamu kan la senior di kantor itu lur, bukan pecak budak yang baru-baru,” simbat Mang Oding mulai senyum sambil ngelirik Mang Juhai.
‘’Benar nian kato Oding, lur. Bahayo bagi kamu itu tuh,” timpal Mang Juhai jugo senyum-senyum. ‘’Memangnyo ngapo kando, bahayo bagi aku. Rasonyo perbaikan idup itu kando, untung bagi karyawan galo-galo,” tanyo Triono penasaran. ‘’Cubo jelaske kando, biar Triono idak pening mikirkennyo kando,” ujar Mang Oding samo Mang Juhai.
‘’Jadi mak ini dindo. Namonyo gaji sesuai UMP itu, biasonyo nguntungke bagi karyawan baru. Sementaro kamu yang karyawan lamo, bukannyo untung, sisip dikit dirugike lur. Soalnyo, karyawan baru kan, gajinyo naik, kareno standar UMP. Sedangkan kamu, gaji la lebih besak dari UMP, biso turun, kareno akan disesuaikan dengan standar UMP,” terang Mang Juhai sambil ketawo ngakak.
‘’Itulah maksud kami lur,” tutur Mang Oding juga melok ngakak dak berenti. ‘’Ai kando, kamu beduo ni nak ngolahke nian. Bingung jugo aku dengan penjelasan kamu tu, tapi ado benarnyo dikit. Kalo mak itu, nak kutanyoke bae dengan bos di kantor, biar idak salah paham,” ungkap Triono. Setelah sempat nelepon bos di kantornyo, Triono baru lega.
‘’Idak mak itu kando, standar UMP itu bagi yang masih dibawah. Sementaro gaji yang lah lebih dari UMP, tetap naik cak biaso. Nah ngolahke nian kamu beduo ni kando,” ucap Triono sambil senyum. ‘’Syukurlah kalo mak itu lur, berarti salah penjelasan aku tadi,” tambah Mang Juhai yang masih ketawo samo Mang Oding. Hahaha, jangan pulok galak ngolahke kawan Mang, kagek dibuatkennyo berita kamu beduo tu, Triono itu wartawan soalnyo. (sam)