MANG Juhai dan Bik Jubai laju begadang semalaman, sebab Bik Jubai merasoke sakit perut yang sangat perih. Ngapo pacak mak itu ye, berikut cerito lengkapnyo.
Lewat tengah malam, Bik Jubai merasoke sakit perut yang sangat perih. Bahkan, saking sakitnyo, raso sakit itu sampe ke ulu atinyo. ‘’Oy kak, bangunlah dulu, aku ni sakit perut, la berapo kali ke kamar mandi,” ujar Bik Jubai, sambil goyangke badan Mang Juhai yang tetiduk pulas. ‘’Nah memang ado apo nian dek, la parah nian apo, sampe nak bangunke uwong nian ini,” jawab Mang Juhai.
‘’Yo kak, sakit nian, sampe ulu ati na sakitnyo, bukan ecak-ecak ini. Bekamke bae kak, siapo tau anginan,” kato Bik Jubai. ‘’Ambeklah bekaman kalo nak dibekam, siapo tau angin nian,” ujar Mang Juhai. Akan tetapi, setelah dibekam, memang sakit perutnyo ilang sebentar dan memang merah. Tapi dak lamo, sakit perut Bik Jubai itu kambuh lagi, hinggo dio ke kamar mandi terus.
‘’Ooh baru ingat aku, adek ni wajar sakit perut, kareno siang tadi idak ingat-ingat makan tekwan buatan dewek. mano pake cabe pedas-pedas, jadi wajar kalo agak kurang bagus di perut. Sudah tu, Cuma makan tekwan bae, idak katek makan nasinyo,” terang Mang Juhai. ‘’Mungkin nian kak, sebab la lamo idak buat tekwan, laju lahap makannyo, apolagi buatan dewek,” jawab Bik Jubai sambil senyum.
‘’Itulah kapan dak ingat-ingat makannyo dek. Laju sakit perut gara-gara tekwan. Uwong tu harus makan nasi dulu, biar dikit ado isi perut, baru makan tekwan mak itu. Ini idak, tekwan dijadike nasi dan lauk, ujungnyo sakit perut, nyaroke laki,” ungkap Mang Juhai. ‘’Yo sudah, kagek idak laki, tapi urusi dulu aku ni. Siapo lagi nak nolong, kalo idak laki kak,” kelit Bik Jubai.
‘’Makonyo baek-baek samo laki, jangan ado perlunyo bae nak baek,” tutur Mang Juhai sambil senyum-senyum. ‘’Nah, banyak nian ocehan ini, urus bae bini sakit ni. Idak sembuh idak, kalo kamu Cuma ngoceh. Carike obat apo kek, biar bini sembuh tu,” kato Bik Jubai. ‘’Yo sudah, laju begadang kito malam ini, gara-gara tekwan tadi dek,” tambah Mang Juhai. Hahaha, benar kato Bik Jubai tu mang, tanggungjawab jadi laki, urusi bini sakit gara-gara tekwan tu. (sam)