MANG Juhai dan Mang Oding, langsung kular-kilir keliling kantor pemerintahan dan dewan di kotanyo. Tujuannyo untuk nyari dana aksi sosial di kampungnyo, yang ternyato masih kurang. Mau tau cerito lengkapnyo, baco ceritonyo dibawah ini.
Siang kemaren, Mang Juhai dan Mang Oding, ketemu dengan kawan-kawannyo yang betugas sebagai Pol PP di kantor pemerintahan di kotanyo. ‘’Oi kando, tambah sehat bae caknyo sekarang, badan la agak gemuk dikit. La lamo kito idak ketemu yo. Ado apo perlu apo nian kando,” tanyo kawan mereka yang seorang Pol PP itu Herlan.
‘’Yo dindo, biaso bae, ado perlu dikit. Lagi banyak idak pejabat masuk kantor ni,” Mang Juhai balek betanyo. ‘’Bukan ado apo nian, kalo memang secaro dinas, isi buku tamu dulu kando, kalo kagek adekmu disini keno marah pulok oleh pejabat disini. Pacak keno gantung aku kando,” kelakar Herlan sambil senyum.
‘’Yo sudah kalo mak itu, kami isi buku tamu lur. Lemak kalo kamu ngomong mak ini, daripado marah-marah,” timpal Mang Oding sambil ketawo ngakak, sehinggo seluruh uwong di kantor pemerintahan itu heran. ‘’Nah kalo la sudah ngisi buku tamu, ku kasih ID Card tamu, sehinggo biso jalan. Tapi ingat, kalo nak masuk ruangan, ngetuk dan nanyo dulu, kagek kamu beduo disangko maling,” terang Herlan lagi.
‘’Oke kalo mak itu, kami jalan yo,” kato Mang Juhai. ‘’Eit tunggu dulu kando, aku penasaran, sebenarnyo kamu tu nak kemano nian,” tanyo Herlan penasaran. ‘’Kami ni nak nyari sumbangan untuk kegiatan sosial di kampung. Soalnyo, acara kami itu masih kurang duit dikit, sementaro acara la mepet, tinggal beberapo hari lagi dindo. Makonyo kami nak ngedarke list sumbangan bae,” jelas Mang Juhai.
‘’Baguslah kalo itu tujuannyo kando, semoga banyak pejabat yang bantu. Soalnyo, acara kamu itu untuk kegiatan sosial kando. Tapi itulah, rasonyo pejabat kami nih la banyak idak ngantor lagi, kalo la liburan samo keluargonyo. Kan libur panjang kando, Natal dan tahun baru,” tutur Herlan. Hahaha, yang penting tetap semangat mang, kalo tujuan mulia mak itu, yakin bae pasti banyak solusinyo, termasuk semoga banyak yang bantu mang. (sam)