RENCANO matang Mang Juhai dan Bik Jubai, untuk belanja ke salah satu Mall diseberang Ilir, laju urung gara-gara ulah Bik Jubai. Ngapo jadi mak itu, baco bae ceritonyo dibawah sampe selesai.
Sore kemaren, Mang Juhai dan Bik Jubai berencano pegi ke salah sikok Mall diseberang Ilir. Sebab, selain nak belanjo, anak mereka Mac Dul jugo pengen mandi bola. Setelah besiap-siap, tigo beranak itu langsung naek motor, menuju seberang Ilir. Tapi, pas dikawasan Pamor atau sebelum naek Jembatan Ampere, tibo-tibo Bik Jubai teriak.
‘’Nah kak makmano, ruponyo aku ni lupo bawak helm. Cak mano kak,” teriak Bik Jubai dari pucuk motor. Spontan, Mang Juhai mberentike motornyo, sambil jingok palak Bik Jubai yang memang dak pake helm atau Cuma ngenoke jilbab itam andalannyo bae. ‘’Ya dek, makmano ini, bahayo kito nak neruske perjalanan,” jawab Mang Jubai.
‘’Tanggung nian sebenarnyo kak, apo kito lanjutke bae,” saran Bik Jubai. ‘’Saro dek kito kalo kamu dak behelm. Sekarang ni uwong nak Natalan; dan menjelang Tahun Baru 2014, banyak polisi dimano-mano. Iyo kalo ketemu kawan kito dek, sebangso plisinyo idak kenal, lokak keno tangkap kito dek,” terang Mang Juhai.
‘’Jadi cakmano kak,” cecar Bik Jubai lagi. ‘’Tepakso kito balek kanan dek, balek ke rumah. Inilah gara-gara adek dak pake helm, laju rencano kito ke Mall berantakan. Mutar bawah Ampera, balek ke rumah, tidok kito jadinyo,” tutur Mang Juhai. ‘’Kapan lagi kito nak ke Mall kalo mak itu kak. Apo kito balek ambek helm, terus berangkat lagi,” kato Bik Jubai.
‘’Sudahlah dek, idak nasib anak kito ke Mall sore ini. Kapan kito lanjutke takut ado apo-apo pulok. Cocok nian pulok dek, adek la idak behelm tadi tu; terus surat motor mati pajak; terakhir SIM kakak mati jugo. Pacak nian plisi nilang samo motor. Urung bae kito yo, kalo ado waktu lagi be, kito ke Mall yo,” tambah Mang Juhai. Hahaha, makonyo Bik nak bemotor tu, jangan lupo make helm. Jangan dianggap jalan di dusun, naek motor dak behelm. (sam)