MANG Juhai dan Mang Oding, dijadike panitia acara perpisahan Ketua RT lamo, dengan Ketuo RT baru di kampungnyo. Apo rencana acara dibuat sohib kental ini, baco cerito lengkapnyo dibawah ini.
Setelah diadoke rapat bersamo warga di kampungnyo, rupanya warga sepakat nunjuk Mang Juhai dan Mang Oding, sebagai panitia, saat perpisahan Ketuo RT di Kampungnyo. ‘’Nah Juhai; dan Oding inilah, yang pas jadi panitia acara perpisahan Ketuo RT lamo dan Penyambutan Ketuo RT baru ini. Kami seluruh warga kampung la sepakat dengan kamu beduo, jangan ditolak lagi,” teriak salah sikok warga saat rapat panitia beberapo malam liwat.
‘’Sekarang apo rencano kamu untuk perpisahan ini,” tanyo warga lainnyo. ‘’Yang jelas, aku samo Oding Cuma panitia, ngeruanke gawe. Sebab, kalo masalah duit, katek kami ni, lagipulok bukannyo kami ni nak nyaleg. Jadi, kito sokongan tepakso, untuk buat acara. Sebagusnyo, kito buat acara siang bae, biar pacak orgenan. Orgenannyo pacak sampe malam jadi, asal ado dana, dan diizinke oleh plisi bae,” ujar Mang Juhai.
‘’Cuma syaratnyo sikok, boleh orgenan, asal idak pake mabok-mabokan, apolagi narkoba yo. Soalnyo, barang mak itu, Cuma pacak ngerusak bae, katek manfaatnyo. Cukuplah kami tejebak dengan setuo itu mudo dulu, sekarang baru nyesal dan nak tobat. Untung bae kami masih sempat nak tobat, belum dijemput ajal. Cubo kalo mati lagi mabok mudo dulu, rasoku idak tecicip lagi kami ni dengan syurgo,” timpal Mang Oding serius.
‘’Benar jugo kato Oding tu, sudah tu jangan ado ribut. Yang nak nyanyi boleh, asal gentian. Sudah tu, cukup sikok-sikok lagu bae nyanyinyo, jangan sekaset sekaligus, laju uwong lain idak katek kesempatan nyanyi lagi,” cerocos Mang Juhai. ‘’Mantaplah itu Juhai; Oding. Apo bae kendak kamu, kami nurut, yang penting acara perpisahan RT itu meriah. Sudah tu, biar kito biso terkesan kompak, oleh warga kampung sebelah,” tutur salah sikok warga.
‘’Akor lah itu, kami akan berusaha adil dengan seluruh warga disini. Semoga bae, kito tetap bedulur. Biarpun genti RT, Cuma kito masih samo-samo tinggal di kampung inilah, masih nak saling tegur tulah,” ungkap Mang Oding. ‘’Benar nian omongan mu Ding. Heran aku, malam ini, Oding bagus nian omongannyo, pecak kiyai atau pejabat itu,” tambah Mang Juhai sambil senyum-senyum. Hahaha, bolehlah kampung kamu ni mang, perpisahan RT bae lagi nak orgenan nian acaranyo. (sam)