MANG Juhai dan Bik Jubai tekejut, waktu belanjo ke pasar yang ada disebelah lorong rumahnyo. Soalnyo, pas nak balek, dio diomongi penjago parkir, kalo duitnyo kurang. Apo masalahnyo ini, baco bae ceritonyo sampe kelar.
Pagi kemaren, Mang Juhai dan Bik Jubai belanjo keperluan rumah tanggo di pasar pagi yang disebelah lorong rumahnyo. Mereka milih ke pasar itu, kareno pasar di lorong rumahnyo nian, kurang lengkap jualannyo. Setelah markirke motor, duo laki bini langsung masuk pasar, untuk belanjo sayuran, ikan, sampe ke bumbu masak.
Sudah belanjo, keduonyo berencano balek ke rumah. Apolagi rago belanjo yang dibawaknyo sudah penuh. Saat itu, ado penjago parkir yang nolong ngeluarke motornyo di parkiran. Sudah nak berangkat, Bik Jubai langsung ngasih duit parkir ke petugas parkir idak beseragam itu Rp 1.000. Tapi, tibo-tibo dio diomongi oleh petugas parkir tadi.
‘’Oy bik, kurang duit parkirnyo ini,” kato petugas parkir idak beseragam itu. ‘’Nah, memangnyo berapo parkir disini kak, biasonyo kan seribu. Lah yang dikasih uwong rumah ni sudah seribu, jadi benarlah itu kuraso,” jawab Mang Juhai sambil senyum sinis. ‘’Idak Mang, sekarang parkir la naek jadi Rp 2.000, kareno segalo barang naek,” ujar petugas parkir itu sambil masang rai seram.
‘’Sekarang mak ini bae kak, aku galak mbayar tambahan duit parkir dengan kamu tuh. Tapi, itulah, aku nak minta karcis parkir nian. Kamu ni resmi apo idak jago parkir disini. Kalo idak resmi, cukuplah toleransi dari kami seribu. Duitnyo jugo bukan untuk negara, tapi untuk kantong kamu dewek,” tutur Mang Juhai.
Pas lagi bedebat dengan petugas parkir itu, ruponyo datang bos jago parkirnyo nian disano, yang ternyato kenal samo Mang Juhai. ‘’Ado apo ini,” kato bos jago parkir itu, yang memang preman lorong setempat. ‘’Ini, mamang ini kurang bayar parkir,” jawab petugas parkir anak buahnyo tadi. ‘’Aku lah ngomong, galak nambah parkir, asal ado karcis yang nunjukke kalo parkir kamu tu resmi,” ungkap Mang Juhai.
‘’Sudahlah salah paham bae ini, kau pulok nak nanyo parker dengan kando kito ini. Ini dulur kito, jangan ditarik lagi parkirnyo lain kali ye. Sudah baleklah kando, minta maaf bae, salah paham ini,” ucap bos jago parkir itu langsung marahi anak buahnyo petugas parkir tadi, kareno memang kenal dengan Mang Juhai.
‘’Yo sudah, kami jugo minta maaf kalo agak kasar, sebab idak tau kalo parker disini naek jugo,” tambah Mang Juhai langsung tancap gas samo bininyo. Hahaha, gara-gara kamu nanyo karcis parkir, laju petugas parkir itu dimarahi oleh bos jago parkirnyo mang. Bolehlah kamu ni, ruponyo bukan Cuma bekawan dengan plisi, dengan preman jugo bedulur mang yo. (sam)