KELUARGO Mang Juhai pecaknyo bakal kumpul di malam tahun baru ini di rumahnyo. Soalnyo, baik uwong tuo; maupun mertuonyo sudah datang ke Palembang. Apo bae yang dibawak mereka saat ke Palembang, baco bae ceritonyo dibawah ini.
Rencano Mang Juhai untuk kumpul keluargo dimalam pergantian tahun atau tahun 2014 ini, bakal terwujud. Soalnyo, baik uwong tuo maupun mertuonyo sudah datang ke Palembang, untuk ngadiri acara itu. Bahkan, mereka jugo banyak bawak barang-barang, yang ternyato sebagian untuk keperluan di malam tahun baru itu.
‘’Juhai, ambekke karung itu, dak terangkat aku,” ujar ibu mertuo Mang Juhai sambil turun dari mobil travel tumpangannyo, mbawak tas sandang pecak penuh dengan duit itu. ‘’Yo mak,” jawab Mang Juhai sambil ngambek karung yang sudah diturunke oleh sopir travel. ‘’Mokasih kak ye,” kato Mang Juhai samo sopir travel itu, yang sudah besiap melanjutke perjalanan, ngantar penumpang lainnyo.
‘’Nah besan kami la datang ruponyo,” kato ibu mertuo Mang Juhai. ‘’Iyo besan, kami la duo hari di Palembang ini,” jawab ibu kandung Mang Juhai. ‘’Apo dio yang dibawak mak, repot-repot nian. Kan la diomongi, bawak badan bae,” tanyo Mang Juhai samo ibu mertuonyo. ‘’Dak banyak, Cuma beras padi baru; samo daging tigo kilo,” jawab ibu mertuo Mang Juhai.
‘’Nah cocok nian, mak mbawak daging; sedangke ibu (uwong tuo kandung Mang Juhai,red), mbawak kemplang panggang dan jagung. Tapi, ngomong-ngomong, daging itu beli mak yo, murah apo daging di dusun sano,” ujar Mang Juhai. ‘’Idak beli idak Juhai. Itu kan daging lebaran idul adha kemaren yang belum abes dimakan. Sebab, selain kito dewek kurban, jugo dapat jatah dari panitia. Kareno banyak, laju mak simpan bae di kulkas,” jawab ibu mertuonyo.
‘’Ya mak, daging lebaran kemaren ruponyo, masih bagus idak mak,” kelakar Mang Juhai. ‘’Masih baguslah, kan mak simpan di kulkas pendingin itu, sudah tu idak dibersihke lagi, jadi masih lemak,” tutur ibu mertuonyo. ‘’Berarti jadi nian kito begadang malam tahun baru. Kemudian, Mac Dul tinggal modal tusuk sate bae. Kan jagung la ado; kemplang panggang ado; ini daging untuk sate jugo dak beli lagi,” tambah Mang Juhai sambil senyum-senyum. Hahaha, itulah guna ado uwong tuo dan mertuo mang ye, jadi namonyo ngundang, tapi bahan disiapke galo. Artinyo samo bae kamu tu nyiapke mulut bae. (sam)