MANG Juhai dan bininyo Bik Jubai, abes keno marah mertuo, dan uwong tuonyo, yang memang masih di rumah mereka, setelah merayoke tahun baru kemaren. Ngapo laki bini ini pacak keno oceh abes-abesan, baco bae ceritonyo dibawah ini.
Pagi-pagi kemaren, Mang Juhai dan Bik Jubai, sudah digedor pintunyo oleh mertuo Mang Juhai. ‘’Jubai bangunlah nak, kami ni nak makan apo, barang abes galo di dapur,” pekik mertuo Mang Juhai manggil anaknyo Bik Jubai. ‘’Yo mak, bentar lagi yo, masih ngantuk nian aku ni,” jawab Bik Jubai dari dalam kamar, sambil narik selimut.
Setelah jam 8 pagi, giliran uwong tuo Mang Juhai berteriak manggil laki bini ini. ‘’Juhai, Jubai, Mac Dul bangun. Kami ni la kelaparan diluar nih, nak makan apo. Makmano kamu laki bini ini, pacak mati kelaparan uwong tuo dan mertuo, kapan dak dienjuk makan mak ini,” ujar uwong tuo Mang Juhai. ‘’Yo mak, kami bangun nah,” jawab Mang Juhai.
Alhasil, laki bini ini termasuk anak semata wayangnyo Mac Dul langsung tebangun. ‘’Pegilah ke pasar, beli sayur dan ikan, biar kito pacak makan belauk. Kami la tuo ni, makan belauk lagi belum tentu benafsu, apolagi idak katek lauk,” kato mertuo Mang Juhai. ‘’Yo mak, ini la nak pegilah, nunggu Jubai abes mandi dulu,” kato Mang Juhai.
Sialnyo, pas Bik Jubai abes mandi dan bepakaian, tibo-tibo ujan deras turun di kampungnyo. ‘’Nah, makmano nak pegi kak, ujan deras mak ini,” tutur Bik Jubai samo Mang Juhai. ‘’Yo dek, basah kuyup kalo pegi bemotor. Apo nunggu ujan berenti dulu kito baru berangkat ye. Kagek laju sakit pulok, nerobos ujan,” ungkap Mang Juhai.
‘’Itulah kamu beduo ni, samo makan tempo, lelet galo. Tadi disuruh ke pasar, masih nak tidok. Sudah bangun, nak mandi, dan nak ngopi dulu. Sudah galo, sekarang ujan deras, laju dak pacak pegi. Giliran ujan berenti kagek, baru nak berangkat, pasar la sepi, kareno la siang. Ujungnyo kito idak makan,” rutuk mertuo Mang Juhai.
‘’Sudahlah kalo mak, kito dak usah ke pasar be dulu ye hari ini. Kan masih ado stok mie samo telok, itu bae lauk kito hari ini ye,” terang Mang Juhai. ‘’Masak mie samo telok, cabe lagi abes kamu ni,” kato mertuonyo lagi. ‘’Kecik kalo itu mak, kito minta cabe tanaman tetanggo bae, untuk masak mie, kan dikit butuh cabenyo,” tambah Bik Jubai. Hahaha, lantak kamu mang, mertuo dan uwong tuo diajak makan lauk mie samo telok nie, kalo kagek keriting galo rambut. (sam)