BIK Jubai sempat cemas dibuat Mang Juhai, setelah keluar dari rumah sakit. Soalnyo, mereka idak katek karcis parkir saat masuk rumah sakit itu. Ngapo pacak mak itu, cubo kito baco beritanyo sampe kelar.
Siang kemaren, Mang Juhai samo Bik Jubai, dan anak semata wayangnyo Mac Dul, langsung menuju rumah sakit pake motor butut andalannyo. Sebab, mertuo Mang Juhai sedang koma di IGD rumah sakit itu. ‘’Kak, payo becepat kito berangkat ke rumah sakit, dulur-dulur aku la kumpul disano, bapak koma,” kato Bik Jubai sambil make jilbab.
‘’Yo dek, ini la siaplah, Mac Dul sudah genti pakaian belum,” tanyo Mang Juhai. ‘’Sudah kak, itu Mac Dul la nunggu di motor,” ungkap Bik Jubai. Setelah setengah jam bejalan, mereka sampe di rumah sakit itu. Tapi, pas nak masuk, di pintu masuk itu, ternyato katek penjago karcisnyo yang nunggu di sano.
‘’Nah, masuk bae kito dek, nak cepat, bukan nak nunggu mereka bae,” kato Mang Juhai. ‘’Dak masalah apo kak, kagek kito saro nak keluar,” ucap Bik Jubai. Alhasil, mereka pun sampe di rumah sakit, dan tejingok dengan mertuonyo atau bapak Bik Jubai yang lagi sakit. Sore harinyo, uwong tuo Bik Jubai baru sadar dari koma.
‘’Alhamdulillah, bapak sudah sadar dek, sehatlah itu bapak,” ungkap Mang Juhai. ‘’Mudah-mudahan cepat sehat dan bekumpul dengan kito lagi kak,” tutur Bik Jubai. Kareno sudah sore, Bik Jubai ngajak Mang Juhai balek. ‘’Kito balek kak, rumah nak diurusi, pakaian mak nak diringkasi, biar pacak begenti, waktu nunggu bapak disini,” kato Bik Jubai.
‘’Yo sudah kalo mak itu, kito balek,” ujar Mang Juhai. Pas nak keluar pintu rumah sakit, Bik Jubai cemas. ‘’Nah kak, kito katek karcis parkir kan, makmano ini,” Bik Jubai ngingatke Mang Juhai. ‘’Kito ni bukan maling motor dek, ngapo nak takut dengan katek karcis,” jawab Mang Juhai. Sebelum penjago pintu masuk nanyo, Mang Juhai langsung ngomong duluan.
‘’Maaf dek, kami ni tadi pas masuk katek karcis parkir. Soalnyo, katek penjagonyo di pintu masuk ini tadi,” kato Mang Juhai samo penjago pintu masuk itu. ‘’Ooh. Maaf Pak, kami biso jingok STNK motornyo,” kato penjago itu. ‘’Boleh dek,” jawab Mang Juhai sambil nunjukke STNK motornyo. ‘’Yo sudah, kalo mak itu, bayar parkir Rp 2.000 bae kak ye,” ucap penjago itu.
‘’Yo sudah, ini duetnyo dek,” tutur Mang Juhai sambil nyerahke duet Rp 2.000. setelah itu, duo laki bini samo anaknyo Mac Dul ini, keluar dari rumah sakit dengan motornyo. ‘’Mak itu kak ye,” kato Bik Jubai. ‘’Yolah dek, ngapo nak takut, dak mungkin kito nak maling motor samo anak bini. Terus, dak mungkin jugo kito nak maling motor butut mak ini. Jadi aman bae kito make motor ini,” tambah Mang Juhai. Hahaha, benar itu Mang, penjago tuh paham jugo, kalo nak maling, dak mungkin ngambek motor butut cak motor kamu tuh. (sam)