GARA-gara Mang Juhai dan Mang Oding betengkar, laju Bik Jubai yang kepeningan lantak duo sohib kental itu. Ngapo keduonyo laju beribut mulut itu, bacok bae ceritonyo sampe selesai.
Siang kemaren, Mang Juhai dan Mang Oding kumpul di rumah Mang Juhai. Sambil ngopi dan makan otak-otak buatan Bik Jubai, keduo lanang pengangguran itu, mulai becerito ngalur-ngidul, mulai dari bahas politik, sampe bahas kecelakaan speedboat terheboh diawal tahun 2014 ini. ‘’Makmano caleg pegangan kito itu kando, la deal belum. Kalo la deal, jangan lambat begerak kito, kagek didului tim atau caleg laen, dekati mato pilihnyo,” ujar Mang Oding.
‘’Insya Allah minggu-minggu inilah sepakatnyo Ding. Kalo dak sesuai dengan kendak kito dan arahan kito, lemak kito dak usah melok Ding. Kareno percuma kito nolong dio, kalo dak bakalan jadi. Itu namonyo kito begawe katek hasil, Cuma dapat capek bae Ding. Pokoknyo progran kerjo kito sebagai tim pemenangan la sudah disiapke kawan kito sebagai Ketuo itu galo, tinggal kalo deal, langsung kito begerak,” jelas Mang Juhai.
Entah ngapo, tibo-tibo obrolan mereka berubah ke masalah kecelakaan speedboat di Sungai Musi itu. ‘’Nah bahayo nian berarti tonggak besi untuk sandaran kapal itu, pacak tujuh ikok yang mati dalam kecelakaan speedboat itu,” kato Mang Juhai. ‘’Nah dak tau kalo yang matinyo tujuh kando, tapi setahu aku korban tewas di koran itu, Cuma ado enam. Jangan nambah-nambahi kando, kareno Cuma 6 yang mati,” tutur Mang Oding.
‘’Lah Ding, aku ni baco koran, makonyo tau yang mati enam,” Mang Juhai idak galak ngalah. ‘’Kando, aku ni baco koran jugo, disano disebutke yang mati 6 ikok. Kemudian, kebetulan kawan aku jugo lagi ngerewangi mertuonyo di rumah sakit waktu kejadian, jugo tahunyo enam yang mati. Makonyo aku bingung, kando nyebut yang mati tujuh itu,” terang Mang Oding.
‘’Sudahlah kamu beduo ni ribut bae, palak aku pening ndengarnyo, laju dak pacak tidok siang ini. Yang jelas yang mati itu 6 ikok, kareno ado kawan aku guru yang jadi penumpang disano. Terus, plisi dekat rumah kito ini, tugas di Sat Polair, jugo ngomongke korban tewas 6, sebab dio ke TKP langsung. Kakak ni awak salah, masih ngotot nak menang tulah, dasar nian memang. Oding pulok, ngalah bae dengan uwong tuo, kareno biar salah dio, masih kito tulah yang disalahkennyo,” ungkap Bik Jubai sambil keluar kamar.
‘’Benar nian itu yuk, caro kando kamilah, nak menang tulah kapan ngomong. Biarpun salah, ngakunyo benar tulah, caro uwong dak galak ngalah. Yo yuk, aku ngalah bae, daripado ngotot-ngototan, laju betengkar katek kesudahan. Lemak ngopi, makan pisang goreng, dan ngobrol yang lain bae kando,” tambah Mang Oding. Hahaha, biaso bae mang Oding ngadapi Mang Juhai tu, caro uwong hebat, biar salah masih nak benar tulah. (sam)