MANG Juhai dan Mang Oding jadi bingung dewek, kareno sudah berapo ikok caleg yang datangi rumahnyo, dalam beberapo hari terakhir. Ngapo para caleg datang ke rumah mereka, baco ceritonyo sampe kelar.
Dalam beberapo hari terakhir, Mang Juhai dan Mang Oding, memang biso dikatoke ketiban rezeki nomplok. Sebab, ado beberapo ikok caleg yang datangi rumahnyo. Anehnyo, ado jugo diantaro caleg datang itu, memang belum pernah dikenal Mang Juhai dan Mang Oding. ‘’Assalamu’alaikum, maaf Pak nanyo, benar ini rumahnyo Mang Juhai,” ujar salah sikok caleg yang datang ke rumahnyo.
‘’Wa’alaikumsalam, benar Pak, masuklah dulu, ado apo,” jawab Mang Juhai penasaran. ‘’Maaf kalo kami agak kurang sopan, tapi apo kami sedang bicara dengan Mang Juhai langsung yo,” tanyo sicaleg itu. ‘’Yo benar Pak, memang ado apo nian yo, duduklah dulu Pak,” ujar Mang Juhai sambil senyum. ‘’Ini kenalke, aku caleg dari Dapil ini mang, pengen ngobrol dan memang sengajo nak nemui Mang Juhai samo Mang Oding,” tutur caleg itu.
‘’Oh, caleg Dapil kami ini jugo Pak ye. Boleh, memang nak ngobrol apo nian,” timpal Mang Oding, yang duduk disebelah Mang Juhai. ‘’Ini mang, kareno kami ni nak caleg, jadi nak minta tolong kamu beduo, sebagai tim pemenangan didaerah ini. Aku tau namo kamu, dari kawan aku yang plisi itu,” ungkap sang caleg. ‘’Oh yo, memang bekawan nian dengan plisi itu ye, sampe disuruhnyo nemui kami disini,” tukas Mang Juhai.
‘’Selain bekawan, memang masih bedulur jauh mang. Makonyo aku berani nemui kamu beduo. Aku berharap, kamu galak nolongi aku, sebab aku ni caleg untuk kota ini dari dapil sini,” tegas caleg itu. ‘’Nah kalo mak itu, insya Allah kami bantu sepacaknyo, sebab siapo nian kami selamo ini,” aku Mang Oding.
‘’Aku memang idak nak minta bantu materi, kareno tau kamu tu pengangguran. Cuma nak minta kamu sosialisasi bae di kampung, kareno kamu beduo tu sudah dikenal uwong dimano-mano, kareno banyak pergaulannyo,” urai caleg itu sambil ngasihke kartu namo dan spanduk yang ado namo, nomor urut dan partai pengusungnyo.
‘’Oke kalo mak itu, ini kami ambek, kagek dibagike dengan warga yo. Kamu tolonglah semampu kami, namonyo jugo dengan dulur kawan,” kato Mang Juhai. ‘’Sudah kalo mak itu, aku pamit balek mang ye. Kalo ado apo-apo telepon bae ke Hp aku. Kemudian, mungkin kagek aku bakal sering maen kesini ye, nak minta bantu kamu sosialisasi dengan warga,” tambah caleg tersebut. Hahaha, benar itu mang, jangan kecewakan uwong, bantu bae semampunyo. Siapo tahu, caleg itu jadi nian, dan ingat dengan kamu kageknyo. (sam)