MESKIPUN kadang dikatoke gelap atau illegal, tapi banyaknyo travel yang menuju dusun Mang Juhai, biso menguntungkan masyarakat. Sebab, Mang Juhai menganggap itulah persaingan travel dalam pelayanan kepada penumpangnyo. Nak tau cerito lengkapnyo, baco beritanyo dibawah ini.
Pagi-pagi Mang Juhai dan Mang Oding sudah ngopi dan makan nasi goreng racikan Bik Jubai, di teras rumah Mang Juhai. Pecak biaso, dengan gaya tauke getahnyo, duo sohib kental ini, duduk sambil baco koran. Pokoknyo entah darimano duitnyo, tapi hampir seluruh koran setiap pagi dibeli oleh uwong duo itu.
‘’Mak inilah Ding kito, biarpun miskin harto, tapi ilmu idak kalah dengan uwong. Soalnyo, dengan baco koran setiap pagi, kito sudah banyak dapat informasi dan pengetahuan. Kemudian, kalo lagi ngobrol dengan uwong, termasuk dengan pejabat sekalipun, kito idak kalah gertak nian, kareno informasi sudah kito baco terus,” kelakar Mang Juhai sambil ngirup kopi di meja yang mulai agak dingin.
‘’Benar itu kando, ado pepatah yang tepat untuk kito beduo ini ‘Wajjahtu Wajjahiya, biar buntu tetap begaya’. Walau duit sepeserpun idak megang, tapi idup kito tenang, tiap pagi masih makan, masih ngopi, termasuk ado bae rejeki untuk beli koran. Idup pas-pasan mak inilah yang lemak kando,” balas Oding juga dengan kelakar betoknyo.
‘’Oh yo Ding, pecaknyo di Sumsel sekarang ini, marak nian katonyo travel gelap atau katek izin alias illegal. Tapi kalo aku berpendapat, terserah mereka nak gelap atau resmi, yang penting pelayanannyo dengan penumpang,” ungkap Mang Juhai. ‘’Samo kalo mak itu kando, biarpun travel resmi, kalo pelayanannyo idak bagus, dak lemak jugo kando. Gelap atau resmi itu yang bedake pemerintah, sementaro kito penumpang pelayanannyo yang bedake,” tutur Mang Oding.
‘’Tapi memang kabarnyo, kalo travel gelap itu, susah bagi kito dapat asuransi kalo kecelakaan Ding. Kalo travel resmi kan, lemak seluruhnyo,” ujar Mang Juhai. ‘’Terserahlah kando, yang penting kito dapat pelayanan maksimal dari travel yang kito tumpangi, itu bae. Masalah asuransi, siapo yang galak kecelakaan kando. Madaki setiap naek travel, kito mikirke kecelakaan, lokak saro badan kito,” kata Mang Oding.
‘’Sudahlah kamu beduo ini, ngobrol ngalor-ngidul bae ini. Makan-makan bae, baco koran bae. Pagi-pagi la ngomongi travel,” celah Bik Jubai. ‘’Oke yuk, benar jugo kato kamu tuh. Yang penting perut kenyang sekarang ini,” timpal Mang Oding. ‘’Yo sudah, kito ngobrol masalah lain bae Ding kalo mak itu,” tambah Mang Juhai. Hahaha, ado benarnyo jugo omongan kamu beduo tu mang, idak penting travel nak gelap atau resmi, yang penting bagi penumpang tuh, memang pelayanannyo mang ye. (sam)