MANG Juhai laju malu dengan pengunjung di Mall, waktu dio samo Bik Jubai dan anaknyo Mac Dul, jalan-jalan sore kemaren. Untung bae, Bik Jubai dan Mang Juhai, punyo alasan yang tepat, ngeredam rengekan anaknyo Mac Dul. Ngapo laju mak itu, baco bae ceritonyo sampe habis.
Sore kemaren, Mang Juhai dan Bik Jubai, diajak anaknyo Mac Dul, jalan-jalan ke salah sikok Mall di kotanyo, kareno pengen mandi bola. ‘’Mak, kito ajak Aba ke Mall bae, la lamo Dul idak mandi bola. Payo kito berangkat sekarang, kareno takut keujanan di jalan,” rengek Mac Dul, samo keduo uwong tuonyo.
‘’Nah, payo nak, ajaklah Aba kau tu,” jawab Bik Jubai, sambil noleh kearah Mang Juhai yang lagi lemak nonton Tv di ruang tamu rumah mereka. ‘’Yo sudah, begentilah pakaian, kito berangkat nak,” ujar Mang Juhai. Setelah bepakaian rapi, tigo beranak ini langsung berangkat menuju Mall tempat mereka biaso belanjo.
Sudah mandi bola, Mac Dul ngajal Aba dan Mak nyo jalan-jalan. Pas keliling Mall, tejingoklah dengan bantal jualan disano. ‘’Ba, beli bantal Angry Bird itu yo, untuk Dul tidok di kamar,” kato Mac Dul. ‘’Neh, alangkah banyak kendak kau hari ini nak, sudah mandi bola, nak beli bantal angry bird jugo ini,” ungkap Mang Juhai.
‘’Yo Ba, beli bantal itu bae yo, sudahnyo sudah,” ujar Mac Dul lagi. ‘’Boleh beli, tapi tanyo samo Mak kau, ado idak duitnyo nak beli bantal itu,” kato Mang Juhai. Becepat Mac Dul ndekati Bik Jubai yang jalan di belakang mereka. ‘’Mak, kato Aba tanyo dengan Mak, untuk belike bantal angry bird itu, boleh Mak ye,” tanyo Mac Dul samo Bik Jubai.
‘’Dak masalah nak beli Dul, tapi Mak samo Aba belum ado duit. Sebab, duit hasil kebun karet di dusun sano, belum dikirim oleh Nek Anang kau. Jadi, tunggu dapat kiriman, kito baru beli ye,” saran Bik Jubai. ‘’Yo sudah kalo mak itu, jadi hari ini kito belum beli ye. Tapi kalo sudah ado kiriman duit, baru beli. Mak janji yo,” cecar Mac Dul.
‘’Mak janji, kagek kito beli, setelah dapat kiriman hasil kebun karet ye,” tutur Bik Jubai. ‘’Yo sudah, sekarang kito belanjo keperluan dulu bae Dul ye, baru kagek kito beli bantal itu, kalo la dapat duit kiriman Nak Anang,” tambah Mang Juhai sambil senyum-senyum. Hahaha, ketahuan nian kalo jadi laki, katek penghasilan. Nak beli bantal untuk anak bae, nunggu kiriman mertuo di dusun. (sam)