MANG Juhai dan Mang Oding, laju ringan dengan pihak developer yang nak bangun perumahan di kampungnyo. Sebab, meraso bangun jalan di kampung itu, laju pihak developer yang nguasoi jalan tersebut. Baco berita lengkapnyo dibawah ini.
Pihak Developer yang nak bangun perumahan di kampungnyo awalnyo bemaksud baek, nak bangun jalan di kampung Mang Juhai dan Mang Oding, sampe ke perumahannyo dibagian belakang lorong. ‘’Nah bagus kalo mak ini, jangan kamu nak bangun perumahan bae, tapi jalan menuju perumahan di lorong ini, idak kamu bangun,” kato Mang Juhai dengan pihak developer itu.
‘’Yo mang, memang nak kito bangun jalan ini, tapi sekadarnyo, jangan sampai rusak nian. Bahkan, gorong-gorong ini kito semen nian, biar lemak ngelewatinyo,” kato pihak developer itu. Namun, dari bangun jalan, termasuk buat gorong-gorong, sampe duo minggu kemudian, pihak developer belum jugo nak bukak jalan itu, dengan alasan semenan gorong-gorong belum kering.
‘’Pak, ini kan, la duo minggu, ngapo jalan dan gorong-gorong ini belum kamu bukak,” tanyo Mang Juhai dan Mang Oding, pas pihak developer lewat depan rumah mereka. ‘’Ooh, belum kering itu Pak, makonyo belum di bukak,” jawab pihak developer itu. ‘’Pak, uwong buyan bae tau kapan semenan pacak kering, idak akan lebih dari seminggu,” tutur Mang Oding.
‘’Kagek kapan kito bukak, laju mobil lewat galo Pak. Kapan banyak mobil, apolagi mobil bangunan ngangkut pasir dan semen, laju jalan rusak lagi. Makonyo kito tutup dulu sementaro waktu,” jelas pihak developer itu. ‘’Oy Pak, kasihan dengan kawan-kawan kami dak pacak lewat. Apolagi yang bemobil, laju dak pacak ngeluarke mobilnyo, gara-gara ini idak kamu bukak,” ungkap Mang Juhai.
‘’Mungkin seminggu atau duo minggu lagi lah Pak, kito bukak jalan itu,” terang pihak developer. ‘’Itu namonyo kamu tu nak nguasoi jalan ini. Jangan kareno kamu mbantu bangun jalan, laju kamu nak nguasoi. Kami ni dari dulu, nambal jalan ini supayo idak rusak, tapi katek kami warga kampung yang nak nguasoinyo. Kalo mak itu, berejolah jalan nak rusak, penting kawan kami nak lewat,” timpal Mang Juhai.
‘’Sudah Ding, bukak kayu penghalang jalan itu, kito bukak. Omongi kawan-kawan kito, lewat-lewat bae, nak rusak rusaklah jalan, saro mereka dak pacak ngeluarke mobil beminggu-minggu, kareno jalan ditutup mak ini,” ujar Mang Juhai kesal.
‘’Yo kando, usir bae kalo dak tu pihak developer ini, kalo nak nguasoi jalan sini. Bukannyo kito warga kampung idak mampu bangun jalan ini gotong-royong,” tambah Mang Oding. Hahaha, benar jugo itu mang, jangan gara-gara mbantu bangun jalan, laju nak nguasoi jalan. Jalan itu punyo umum, segalo warga boleh manfaatke jalan lorong itu. (sam)