MANG Juhai dan Mang Oding, sempat nyindir kawannyo yang wartawan Triono, saat keduonyo diajak Triono, ndatangi acara pemilihan Ketua organisasi wartawan di provinsinyo, kemarin. Ngapo Triono, laju disindir, berikut ceritonyo dibawah ini.
Kareno katek gawe, Mang Juhai dan Mang Oding, tejingok manyun di pos ronda di kampungnyo. Kareno kebetulan lewat, kawan mereka yang wartawan itu, Triono, laju mampir di pos ronda. ‘’Lagi ngapoi kando, pecaknyo manyun bae ini,” tanyo Triono. ‘’Biasolah lur, caro katek gawe, laju manyun. Lagian baru pacak keluar nak sore, kareno dari pagi sampe siang, ujan deras,” jawab Mang Juhai.
‘’Sudahlah kalo katek gawe, kito cari gawean. Payo melok aku, kito ndatangi acara pemilihan ketuo organisasi wartawan. Walaupun dak pacak milih, paling idak kito melok makan dan minum jadilah. Siapo tau kecipratan rezeki dari tim sukses calon ketuonyo,” terang Triono. ‘’Nah, laju kalo mak itu lur, kebetulan kami la rapi mak ini, langsung berangkat bae kito kesano, ngilangke suntuk,” ujar Mang Oding laju semangat.
Sampe di tempat acara, Mang Juhai dan Mang Oding, agak minder jugo awalnyo, sebab banyak dak kenal dengan wartawan disano. ‘’Ai banyak dak kenal aku dengan rombongan wartawan ini lur. Ngapo lain dengan wartawan yang biaso betemu kito di lapangan itu ye. Di acara ini, mulai dari wartawan mudo, sampe wartawan senior dan tuo, ado galo. Kemudian, banyak sampe ratusan, bahkan pacak ribuan ruponyo wartawan di provinsi kito ini yo, kalo dikumpulke,” tanyo Mang Juhai samo Triono disebelahnyo.
‘’Nah kando, jangankan kamu, aku bae banyak dak kenal dengan wartawan-wartawan itu. Tapi setahu aku, kalo dari koran harian di provinsi kito, aku tau galo uwong-uwongnyo, walaupun idak kenal. Kalo mereka itu, mungkin koran daerah kando, jadi banyak dak tau aku,” tutur Triono. ‘’Makmano kau ini, madaki dengan sesamo wartawan idak saling kenal ini. Berarti belum tekenal nian kau tu,” sindir Mang Juhai sambil senyum-senyum.
‘’Bukan mak itu kando, kalo wartawan harian aku tau, tapi ini jingok mereka lagi baru inilah, jadi makmano nak kenal,” terang Triono yang tejingok rainyo agak merah. ‘’Yo oi, tau kami maksud kau itu. Kelakar bae kami ni, kagek laju kau tinggalke kami disini, katek kawan laju, bengong bae kami pacak,” timpal Mang Oding jugo senyum. ‘’Idaklah kando, tanggungjawab dindo kamu ni, kapan ngajak kesini ni,” tambah Triono. Hahaha, jadi banyak ruponyo wartawan itu mang ye, pacak ribuan kalo dikumpulke galo se-provinsi kito ini ye. (sam)