SAAT rapat dengan timses dengan salah sikok caleg jagoannyo, Mang Juhai dan Mang Oding, dikatoi oleh timses lain. Soalnyo, mereka beduo rapat pake sandal. Sementaro timses lain, apolagi calegnyo pake sepatu galo. Ngapo duo sohib kental ini pake sendal, berikut ceritonyo.
Siang kemaren, Mang Juhai dan Mang Oding, pake baju rapi dengan kemeja dan sepan dasar yang sudah digosok. Pas masuk ruko di daerah Jalan Angkatan 45, mereka langsung ketemu dengan kawan-kawannyo lain. Ruponyo, Mang Juhai dan Mang Oding itu, berencano rapat timses dengan caleg jagoannyo. Ruko itu, tempat rombongan ini ngumpul.
Sebelum rapat, kawan-kawan mereka yang lain, langsung aneh jingok Mang Juhai dan Mang Oding, yang pake sandal. Sementaro mereka pake sepatu galo. Ado diantaro mereka yang senyum-senyum, kareno jingok sepan dasar duo sohib itu, agak digulung ke pucuk. ‘’Maaf kawan-kawan, ado apo nian, ngapo pecak aneh jingok aku dan Oding ini,” tanyo Mang Juhai.
‘’Bukan apo-apo kando, kito ni timses, jadi walaupun kantong kosong alias buntu, tapi tetap harus begaya. Biar warga atau pemilih yakin dengan kito. Kalu pemilih yakin, mudah kito masukke omongan, supayo milih caleg jagoan kito ini,” ungkap salah sikok timses bernamo Mang Jati.
‘’Memang ado yang salah dengan pakaian kami ini lur,” timpal Mang Oding yang agak heran dengan omongan Mang Jati.
‘’Yo agak aneh bae kando, maaf kalo agak nyakiti perasaan kamu beduo. Kamu beduo tu memang la pakaian rapi. Tapi, pertamo, ngapo pake sendal. Keduo, ngapo laju sepan agak digulung mak itu,” tutur Mang Jati, yang buat timses lain, maupun caleg jagoan mereka ketawo. ‘’Oke kalo yang itu kami akui. Tapi nak dijawab jujur apo idak,” kato Mang Juhai ngilangke malu.
‘’Memang ado apo Mang,” tanyo s icaleg jagoan mereka. ‘’Mak ini Pak caleg, jalanan depan rumah kami tu, kapan sore pasang. Jadi banyu genangi jalan sampe pucuk mato kaki.
Sudah itu, jalanannyo belum diaspal, jadi masih rusak. Kapan kami pake sepatu, pacak basah sepatu, kareno nak ngelakke jalan. Makonyo kami pake sendal, termasuk sepan digulung dan lupo nurunke sepan ini,” jelas Mang Juhai.
‘’Yo sudah kalo mak itu, biso kito maklumi, kareno memang musim ujan. Sekarang kito mulai bae rapatnyo, untuk nentuke strategi menangke jagoan kito ini, supayo berhasil jadi dewan. Setelah itu, pacak mbagusi jalan, terutamo daerah rumah Mang Juhai,” tukas Mang Jati lagi.
“Aamiin, aamiin, mak itulah doa yang bagus itu lur,” tambah Mang Juhai. Hahaha, makonyo mang, nyari rumah tu, jangan di pinggir sungai, tapi di tengah kota, biar idak keno banyu pasang. (sam)