ITULAH kalo jabatan yo, walaupun banyaklah ngantar wong masuk nerako, tapi tetap bae jadi rebutan. Termasuk untuk jadi Ketuo RT. Makmano ceritonyo ?
Pagi-pagi, pecak biaso, Mang Juhai dan Mang Oding sudah kumpul di teras rumah Mang Juhai. Sambil ngopi dan makan pisang goreng buatan Bik Jubai, duo sohib kental ini, mulai baco koran yang memang idak tau darimano duitnyo, tapi sudah dibeli. Maklum, selain memang pengangguran, keduonyo jugo belum dapat angpao dari caleg yang dijagokennyo.
‘’Nah makmano lagi ini Ding. Madaki si Amin masih nak pengen jadi Ketuo RT, padahal kemaren kan kalah,” ujar Mang Juhai bukak omongan. ‘’Aneh jugo itu kando, makmano ceritonyo,” ujar Mang Oding.
“Idak tau jugo, tapi mang Amin protes dio kalah jadi RT,” simbat Mang Juhai.
“Tapi hasil akhirnya kando,” cecar Mang Oding lagi. ‘’Hasil akhirnyo, dak pacak menang jugo,” kato Mang Juhai. “Tapi memang lemak nian jadi pejabat tu kando, kemano-mano disambut uwong, temasuk jadi RT,” ujar Mang Oding.
‘’Lemak memang Ding, tapi resikonyo kalo dak pacak jalanke dengan jujur, pacak ke nerako diakhirat kagek,” tutur Mang Juhai.
‘’Ngapo mak itu kando,” tanyo Mang Oding. ‘’Lah jabatan itu amanah Ding. Kalo kito jalanke amanah di jalan yang benar, ganjarannyo surgo dari Tuhan. Tapi kalo kito nyalahgunoke amanah, misalnyo korupsi, meras uwong, dan lainnyo, ganjaran di dunio dipenjara, sementaro ganjaran diakhirat kagek nerako tempatnyo,” tegas Mang Juhai.
‘’Memang benar itu kando, tapi kebanyakan pejabat kito ni idak mikir ke akhirat, masih sebatas dunio galo kando. Paling sebagian yang mak itu. Soalnyo, uwong begawe di Kemenag Jakarta bae, ado yang terlibat korupsi al qur’an kando,” kato Mang Oding.
‘’Itulah kalo kito tepengaruh dengan dunio bae Ding, akherat idak dipikirke. Laen dengan kito, biarlah dunio saro, yang penting akherat masuk surgo Ding,” tambah Mang Juhai. Hahaha, benar jugo itu mang. Tapi nak lemak lagi, didunio senang, diakherat masuk surgo, lemak kan mang. (sam)