MANG Juhai dan Mang Oding, lagi-lagi ketiban apes, tapi masih beruntung. Saat mengendarai motor butut andalannyo, keduonyo keno razia gabungan plisi didaerah Jalan Kolonel H Barlian. Makmano cerito lengkapnyo, baco bae beritanyo dibawah ini.
Malam kemaren, Mang Juhai dan Mang Oding, dengan motor butut andalannyo maen ke rumah kawan lamonyo Mang Benu, dikawasan Talang Buruk. Kareno la hampir jam 12 malam, duo sohib kental ini, pamit balek dengan Mang Benu. Pas mutar didaerah Jalan Kolonel H Barlian, nak balek ke rumahnyo diseberang, mereka jingok kerumunan uwong, laju ndekat.
‘’Mati mamak, razia gabungan ruponyo Ding. Aku kiro ado kejadian apo. Dak pacak nak ngelak lagi kito Ding,” ujar Mang Juhai. ‘’Yo nian kando, apes nasib kito mala mini,” jawab Mang Oding. Alhasil, begitu lewat, keduonyo memang disetop plisi pangkat Bintara. Pas keduonyo berenti, langsung didekati dan diberi hormat oleh plisi mudo itu. ‘’Malam Pak, boleh jingok surat-surat kendaraannyo,” kato plisi itu.
‘’Boleh Pak,” jawab Mang Juhai sambil ngenjukke STNK motor fotokopian dan SIM dari dompetnyo. ‘’Nah, ngapo STNK fotokopian ini Pak,” tanyo plisi mudo itu. ‘’Yang asli ketinggalan di rumah Pak, Cuma ado yang fotokopi, soalnyo tadi buru-buru nak jingok kawan sakit,” ucap Mang Juhai bebohong dikit. ‘’Ooh, terus ngapo pelat Nopol di belakang dak katek Pak,” cecar plisi itu lagi.
‘’Nak mati nian kito kando, lepas pelat belakang ini,” bisik Mang Oding samo Mang Juhai. ‘’Anu Pak, pelatnyo lepas tadi, idak ketaunan. Maklum Pak, kareno bautnyo tinggal sikok sebelum berangkat tadi,” jawab Mang Juhai sambil bebohong lagi. ‘’Kalo mak itu, kami dak biso bantu Pak, kito tahan dulu motornyo, kareno dicurigai hasil kejahatan,” terang plisi itu.
Untungnyo, pas plisi itu nak nulis tilang, tibo-tibo muncul kawan mereka yang wartawan itu, Triono. Triono ruponyo memang melok ngeliput razia itu. ‘’Hoi kando, apo kabar kamu beduo ini,” pekik Triono samo Mang Juhai dan Mang Oding. ‘’Nah kak, kenal, kawan kito apo,” tanyo plisi itu dengan Triono. ‘’Yo kmdan, rai bae jahat kando kito duo ini, tapi atinyo bae. Mereka bukan bandit kmdan,” jawab Triono sekenonyo.
‘’Mak ini bae kak, kalo mak itu, malam ini aku lepas kawan kakak duo ini. Tapi syaratnyo, lain kali, dio harus bawak STNK asli, kemudian pelat Nopol belakang motornyo dipasang. Kalo masih mak inilah, tepakso aku tilang nian lain kali kak,” tutur plisi itu. ‘’Yolah kalo mak itu, pacak aku ngomonginyo kmdan,” ungkap Triono.
‘’Kami mokasih komandan. Kami janji akan bawak STNK asli, samo masang pelat Nopol belakang motor,” tambah Mang Juhai. Hahaha, memang nasib sial, tapi ado untung banyak kawan kamu beduo tu Mang. Cubo katek kawan wartawan ngeliput razia, alamat balek jalan kaki kamu beduo tu. Sebab apo, dicurigai bandit tulah, rai la nunjuk, BG belakang katek mak itu. (sam)