SUNGGUH diluar kebiasoan, Mang Juhai dan Bik Jubai yang merupoke penikmat bakso sejati, malah nolak saat diajak Mang Oding makan bakso di dekat lorong rumah mereka. Apo alasannyo ye, baco bae beritanyo sampe selesai.
Sore kemaren, kareno abes ujan, Mang Oding dan bininyo mampir ke rumah Mang Juhai. Ruponyo, laki bini itu, nak ngajak Mang Juhai dan Bik Jubai, makan bakso di dekat lorongnyo. ‘’Kando, ayuk, payo kito nyari makanan yang panas-panas sore ini, sebab dingin nian pecaknyo abes ujan mak ini,” ujar Mang Oding begitu sampe depan rumah Mang Juhai.
‘’Nah payo, galak nian aku kalo lokak lemak mak ini Ding,” jawab Mang Juhai. ‘’Tapi kito nak makan apo lemaknyo sore mak ini Ding,” simbat Bik Jubai. ‘’Makmano kalo kito makan bakso bae yuk, kan lemak panas dan pedasnyo,” jawab bini Mang Oding sambil senyum-senyum. ‘’Yo makmano yuk, kito makan bakso bae apo,” timpal Mang Oding.
‘’Ding, kalo nak makan bakso lajulah kamu ye, ayuk masak mie bae jadilah,” ujar Bik Jubai. ‘’Ngapo mak itu yuk, kan lemak bakso yuk. Makan mie terus, pacak keriting rambut,” kelakar Mang Oding. ‘’Yo yuk, emang ngapo dak galak makan bakso, ado apo nian. Kalo dak tu, kito makan model atau tekwan bae,” kato bini Mang Oding lagi.
‘’Mak ini bae dek, Ding, ngapo ayuk dak galak makan bakso. Awak tiap ari baco koran, tapi otaknyo idak panjang-panjang, idak jauh pikirannyo. Kamu tebaco kan di koran beberapo ari lalu, rego daging lagi mahal sampe Rp 200 ribu sekilo. Bahkan, banyak penjual daging mogok jualan, kareno daging mahal,” cerocos Bik Jubai panjang lebar.
‘’Apo hubungannyo dengan kito makan bakso yuk,” tanyo Mang Oding. ‘’Inilah kau tu belum nyambung. Baso bahan buat bakso itu daging Ding. Kapan daging mahal, mestinyo penjual bakso naekke rego ye. Tapi, kalo katek uwong jualan daging, jadi bahan buat baksonyo pake apo. Nak bahannyo ikan, idak keno Ding. Retikelah dewek oleh kau Ding, maksud ayuk ni,” jelas Bik Jubai.
‘’Benar nian itu Ding, aku setuju dengan ayuk kau, lemak kito dak usah makan bakso dulu, sebelum rego daging stabil, dan penjual daging idak mogok lagi. Takut bae, kagek ado apo-apo Ding,” sambung Mang Juhai. ‘’Benar jugo omongan ayuk tu kak, laju belum makan bakso aku lah mual dengarnyo. Sudah kalo mak itu, kito makan tekwan atau model bae yuk, payo berangkat kito,” tambah bini Mang Oding. Hahaha, la benar pulok omongan Bik Jubai sekali ini yo. Tapi ingat Bik, idak seluruh penjual bakso kesulitan daging, mungkin mereka ado stok lamo. (sam)