KARENO musim banjir, Mang Juhai dan Bik Jubai, laju diajak anak semato wayangnyo Mac Dul, untuk beli perahu. Ngapo sampe nak beli perahu nian yo, simak bae ceritonyo dibawah ini.
Siang kemaren, Mang Juhai telesu di rumahnyo. Soalnyo, gawenyo Cuma nonton Tv, makan, dan baco Koran. ‘’Payo kak, gawe Cuma baco Koran, nonton Tv, dan makan. Tolongi adek di dapur ini apo, bantu cuci piring jadilah,” sindir Bik Jubai. ‘’Ai dek, bagian dapur itu, gawe adek bae. Kakak ngasuh anak bae jadilah,” jawab Mang Juhai.
Tibo-tibo Mac Dul yang lagi nonton Tv, langsung berteriak dengan Aba dan Maknyo itu. ‘’Bah, Mak, kito beli perahu bae, kan lagi banyak banyu depan rumah,” celetuk Mac Dul. ‘’Memang untuk apo perahu nak, buang-buang duet bae,” jelas Mang Juhai. ‘’Yo Dul, nak untuk apo nian kau perahu,” Bik Jubai balek betanyo kareno penasaran dengan omongan Mac Dul.
‘’Mak, perahu itu kan pacak untuk kito jalan-jalan. Jingok nah uwong di Tv, la banyak bejalan pake perahu galo. Makonyo kito beli bae sikok,” kato Mac Dul. Ruponyo, Mac Dul jingok uwong lagi ngevakuasi warga yang kebanjiran di Jakarta pake perahu, laju nak minta belike jugo. Sebab, Mac Dul nganggap perahu itu sebagai sarana transportasi warga untuk jalan-jalan.
‘’Dul, gambar uwong naek perahu itu, kareno la susah nak bejalan kaki nak, soalnyo banyu sampe semeter lebih di Jakarta itu. Sementara didepan rumah kito ini, banyak paling baru sekitar 30-40 centimeter nak. Jadi belum pacak bejalan make perahu untuk banyu kito ini. Lain halnyo dengan Jakarta itu nak yo,” jelas Mang Juhai.
‘’Yo Dul, lain kalo kito di sunge nian, pacak kito maen perahu. Tapi depan rumah kito, belum tinggi nian banyunyo. Bahkan, kalo motor knalpot tinggi bae, masih pacak lewat nak. Sudahlah yo, daripado beli perahu, kito beli makan bae ye,” terang Bik Jubai. ‘’Oh untuk uwong kebanjiran mak ye perahu itu, bukannyo untuk uwong di Tv jalan-jalan,” tanyo Mac Dul lagi.
‘’Yo nak untuk uwong kebanjiran bae perahu itu. Kalo kito ni belum banjir, Cuma banyu genangi jalan bae, walaupun sudah setinggi lutut banyunyo. Tapi kalo memang la banjir nian, bolehlah kito beli perahu nak ye,” tutur Mang Juhai. ‘’Semoga bae idak banjir, jadi kito idak perlu beli perahu,” tambah Bik Jubai. Hahaha, saran Mac Dul itu ado bagusnyo jugo mang, bik, soalnyo siapo tau banjir nian, jadi sudah ado perahu. Ibaratnyo sedio payung, sebelum ujan mang. (sam)