MUSIM banjir depan rumahnya yang sampe paha anak-anak, dimanfaatkan oleh Mac Dul, untuk nyari iwak. Pake alat apo anak semato wayang Mang Juhai dan Bik Jubai ini, baco bae ceritonyo dibawah ini.
Kareno musim banjir, apolagi hari libur mak ini, Mang Juhai idak pacak bediam lagi di rumah. Sebab apo, sedikit-sedikit dio la dipanggil oleh Mac Dul, untuk ngerewangi macam-macam. Nah, lagi lemak tidok pagi kemaren, Mang Juhai sudah dibangunke anak semato wayangnyo itu. Terus diteriaki, walaupun mato masih ngantuk, mamang kito ini tepakso bangun tulah.
‘’Bah, bangunlah dulu, rewangi Dul yo,” teriak Mac Dul berulangkali. ‘’Yo Dul, memang ado apo nak, minta direwangi nian. Ini masih pagi, kan Dul libur jugo, abah tidok dulu yo, masih ngantuk,” jawab Mang Juhai. Meraso idak dituruti kendaknyo, Mac Dul langsung narik tangan Mang Juhai, sehinggo Mang Juhai tepakso buka mato akhirnyo.
‘’Ado apo nian nak,” tanyo Mang Juhai sambil ngucek matonyo. ‘’Kito nyari iwak bae Bah, kan ado waring di dapur, waring lamo Abah dulu kato Mak,” jelas Mac Dul. ‘’Nak dijadike apo waring itu nak, banyak apo ikan nak,” ungkap Mang Juhai. ‘’Kito buat tangkul (sejenis alat tangkap ikan pake satang sebagai pengangkat waringnyo,red), pasti banyak dapat ikan,” ujar Mac Dul.
‘’Yo sudah kalo mak itu, kito buat, tapi yang jagonyo Dul tulah ye. Abah buat tangkul bae, Dul yang nyari iwaknyo,” kato Mang Juhai. Idak butuh waktu lamo bagi Mang Juhai untuk buat tangkul itu. Soalnyo, waring la ado, terus nyari bambunyo cepat, kareno ado di belakang rumahnyo tulah. ‘’Nah, sudah tangkul nyo nak, Abah tarok di banyu agak dalam di jalan itu ye,” tutur Mang Juhai samo anaknyo Mac Dul.
Alhasil, kareno nyari iwak itu, Mac Dul sampe tigo kali genti celano dan baju, kareno basah kuyup. ‘’Oy Dul, ini alasan kau bae ye nyari iwak. Buktinyo, iwak dak dapat, malah kau ngabisi pakaian di lemari, kareno la berapo kali begenti baju dan celano. Payo nak, kagek sakit pulok. Kemudian, ari ni galak dak panas, nyemuri pakaian sampe 2-3 hari baru kering. Kalo kagek abes pakaian kau, basah galo,” rutuk Bik Jubai samo Mac Dul.
‘’Neh Mak ni, ini ado dapat iwaknyo, iwak sepat samo betok, jadilah Mak untuk lauk makan Dul bae,” jawab Mac Dul sekenonyo. ‘’Iyo kalo dapat 4-5 ikok ini, Cuma cukup untuk kau bae Dul. Idak balek modal ke dokter, kalo kau sakit gara-gara nyari iwak ini,” cerocos Bik Jubai.
‘’Sudahlah duo beranak ini rebut bae. Biarkelah Dul itu, idak kan lamo, capek dewek dio. Berenti dewek kapan badannyo la capek ngangkat tangkul itu dek,” tambah Mang Juhai. Hahaha, pecak kato uwong tu, bukan semato musibah banjir sampe depan rumah mang ye, ado berkahnyo jugo. Buktinyo Mac Dul pacak nyari iwak, idak perlu nak ke sunge nian lagi. (sam)