GARA-gara caleg jagoannyo idak datang ke kampungnyo, Mang Juhai dan Mang Oding, laju keno rutuk oleh warga sano. Ngapo pacak runyam mak itu mang, baco bae beritanyo sampe kelar yo.
Sesuai janjinyo, Mang Juhai dan Mang Oding, minta warga datang ke rumahnyo, kareno ado caleg jagoannyo berencano nak bage-bage sembako. Kareno dengar ado yang nak dibage, ratusan warga di kampung duo sohib kental ini, becepat datang. Bahkan, biarpun jadwal acaranyo direncanoke mulai pukul 10.00 WIB sampe pukul 15.00 WIB itu, tapi warga sudah kumpul mulai jam 09.00 WIB pagi.
‘’Payo ibu-ibu kito berangkat ke rumah Mang Juhai nah, kan nak ado bage-bage sembako hari ini. Becepat bae kito, kagek lamo ngantre, dan takut idak kebagen,” teriak Bik Cek, salah sikok warga sekampung Mang Juhai dan Mang Oding. ‘’Yo Bik Cek, kami la siap galo ini, apo langsung bae kito kesano, biar idak lamo ngantrenyo,” jawab salah sikok ibu-ibu di kampung itu.
Alhasil, Mang Juhai dan Mang Oding yang lagi lemak ngopi dan baco koran di teras rumah Mang Juhai, tekejut dengan kedatangan ratusan ibu-ibu itu. ‘’Ado apo ini ibu-ibu, ngapo cepat nian datangnyo. Kan acara direncanoke baru dimulai jam 10,” tanyo Mang Juhai. ‘’Idak apo-apo Mang, kami datang cepat, biar idak lamo ngantre,” jawab Bik Cek, yang mimpin rombongan ibu-ibu ndatangi rumah Mang Juhai pagi itu.
Tapi sayang, sampe siang, sang caleg jagoan Mang Juhai dan Mang Oding, belum jugo datangi memenuhi janjinyo, nak bage-bage sembako. ‘’Makmano ini mang,” pekik ibu-ibu itu serentak. ‘’Sabar ibu-ibu yo, bentar lagi caleg kito datang. Atau kamu baleklah dulu, makan siang, terus jam 1 kito kumpul lagi,” jawab Mang Oding bingung, kareno caleg mereka belum jugo datang, apolagi nak bageke sembako.
Ruponyo sampe sore harinyo, caleg itu idak jugo datang, hinggo ratusan ibu-ibu itu kecewa. Kareno ngilangke raso dak lemaknyo la ngundang uwong, Mang Juhai langsung ngomong dengan ibu-ibu itu. ‘’Maaf ibu-ibu yo, ternyato caleg kito itu lagi diluar kota, jadi idak pacak datang. Soalnyo, dio ditelepon mendadak, untuk pertemuan dengan bos partainyo. Dio janji bakal bageke sembako itu, tapi belum tau kapan waktunyo yo. Sekarang, ibu-ibu baleklah dulu, kapan la ado jadwalnyo, aku kasih tau lagi,” jelas Mang Juhai.
‘’Oy mang, omongi caleg kamu tu, kalo memang katek duet, dak usah banyak bejanji, daripado nyakiti ati kami. Inilah kamu ni, belumlah jadi dewan, la ingkar janji dengan rakyat, apolagi lah jadi kagek,” jawab Bik Cek yang memang tekenal agak cerewet dan judes di kampung mereka itu.
‘’Yo sudah, pokoknyo ado bage-bage sembako itu, aku janji. Tapi, waktunyo bae aku pastike lagi dengan caleg kito itu ye. Maaf nian sebelumnyo,” tambah Mang Juhai. Hahaha, dak usah bingung mang, sabar bae, mungkin ado hikmahnyo galo dari segalo cobaan ini. (sam)