MANG Juhai dan Mang Oding, dak biso berkato apo-apo lagi, setelah tanyoannyo dijawab dengan senyum-senyum oleh Pak Lurah, waktu ninjau banjir di kampungnyo. Apo omongan Pak Lurah yang sangat menyentuh hati keduo sohib kental ini, baco ceritonyo dibawah ini.
Siang kemarin, Mang Juhai dan Mang Oding ngerewangi Pak Lurah, yang sedang ninjau banjir di kampungnyo. Bahkan, kareno dianggap sebagai tokoh masyarakat setempat, warga sekitar banyak nitip omongan dengan keduo sohib itu, untuk disampaike dengan Pak Lurah. Alhasil setelah jalan-jalan pake sepatu bot, Pak Lurah diajak mampir ke rumah Ketuo RT setempat, untuk berbincang-bincang dengan warganyo.
Kareno agak jarang ketemu dengan sang Lurah, tentu bae warga sekitar sangat banyak tanyoan, terutamo untuk tujuan kesejahteraan rakyat disano. ‘’Pak Lurah, makmano tentang pembangunan kampung kami ni, terutamo bangun jalannyo yang belum pernah diaspal bepuluh-puluh tahun ini. Apolagi abes banjir mak ini, pasti banyak jalan disini yang tambah rusak Pak,” ujar salah sikok ibu-ibu warga setempat.
‘’Untuk pembangunan kampung ini, terutamo pembangunan jalannyo, memang sedang kito usulke ke Dinas terkait, termasuk dinas PU. Tapi, begitu kito tanyo proposal ajuan pembangunan itu, diomongke pihak PU, kalo segalonyo lagi diproses. Jadi, sekarang kito cuma pacak nunggu. Semoga bae proposal yang diajuke cepat ditanggapi, dan pembangunan disini, terutamo jalannyo biso cepat terealisasi,” jawab Pak Lurah.
Terakhir, Pak Lurah sampe tekejut dengan pertanyoan Mang Juhai, soal pembagian Beras Raskin di kampungnyo, yang ternyato tahun ini belum dibagike. ‘’Maaf Pak Lurah kalo kami ni agak lancang. Kiro-kiro untuk beras raskin yang biasonyo dibagi tiap setengah tahun itu, kiro-kiro bakal dibagike idak diawal tahun ini. Apo memang beras raskin itu sudah dihapuske oleh pemerintah Pak Lurah,” tanyo Mang Juhai serius.
‘’Nah kalo untuk beras raskin, jugo bakal dibagike, samo pecak tahun-tahun sebelumnyo lah. Cuma memang, kareno belum ado kiriman berasnyo dari pusat, jadi pembagian beras raskin itu, yang biasonyo bakal dibage bulan Januari, mungkin tahun ini akan diundur. Yang jelas, kito idak akan nahan jatah beras raskin rakyatlah. Kalo memang berasnyo la dikirim dari pusat, secepatnyo beras raskin itu, kito bagike. Jadi, saat ini sabar dek ye,” terang Pak Lurah sambil senyum-senyum kecil.
‘’Wah bijak nian kato-kato Pak Lurah ini kando. Pake ngomong ‘Sabar Dek Ye’. Tapi kami tetap akan bersyukur Pak Lurah. Dengan penjelasan kamu tadi, tapi agak tenang. Sebab, Pak Lurah ngomong, beras raskin belum dibagike kareno memang belum ado kiriman berasnyo. Artinyo, biarpun agak lambat, beras raskin itu pasti dibagike,” timpal Mang Oding. ‘’Yo mak itulah kiro-kiro dek, sekarang sabar bae dulu dek ye,” tambah Pak Lurah. Hahaha, bolehlah ye, pacak nian Pak Lurah nenangke ati warganyo. Apolagi kato-kato ‘Sabar Dek Ye’ sangat nyentuh perasaan rakyat di kampung Mang Juhai nian. (sam)