MANG Juhai dan Mang Oding, diajak kawan lamonyo yang toke getah, Mang Benu, untuk masuk salon. Namun sial bagi Mang Juhai, gara-gara terlalu milih cewek yang untuk ngelayaninyo, laju dio tepilih dengan cewek jadian-jadian. Makmano ceritonyo, baco beritanyo sampe kelar.
Siang kemaren, Mang Juhai dan Mang Oding, diajak Mang Benu ke salah sikok salon dikawasan Seberang Ilir. Bukan untuk berbuat yang idak-idak, tapi mereka memang nak ngerawat badannyo. ‘’Payo kando, kito ngerawat badan bae kalo mak itu, ke salon kito,” ajak Mang Benu. ‘’Bebenar Benu, kau jangan ngajak kami rusak lagi. Kami ni la nak tobat dan berubah nian sekarang,” ucap Mang Juhai.
‘’Itulah, beteriak la berubah, tapi pikiran masih ngeras. Kito ngerawat badan nian kando, bukan nak bebuat yang macam-macam. Kamu nak spa, nak luluran, nak creambath, terserah, aku yang bayar. Galak idak, mumpung aku lagi baik ini,” kato Mang Benu. ‘’Yo nian kando, sesekali kito manjoke badan. Jangan Cuma digosok pake sabun waktu mandi bae badan ini. Biar bersih dikit badan kito,” tutur Mang Oding.
Pas sampai disalah sikok salon dikawasan Seberang Ilir, Mang Benu langsung ngomong nak spa. Kemudian, Mang Oding jugo ngaku nak spa, biar mbersihke badan. Terakhir, Mang Juhai ternyato Cuma nak cuci rambut bae. ‘’Dek berhubung kawan kakak nak spa galo-galo, kakak idak nak banyak-banyak, Cuma nak cuci rambut bae,” kato Mang Juhai dengan pengurus salon itu.
Dengan omongan Mang Juhai itu, Mang Benu dan Mang Oding, laju ketawo ngakak. ‘’Neh ngapo kamu beduo malah ketawo ini,” tanyo Mang Juhai penasaran. ‘’Idak kando, idak gaul nian. Madaki masih ngomong nak cuci rambut. Creambath kando baso gaulnyo itu,” jelas Mang Benu. ‘’Oi Benu ecak-ecak bae kando kau ini, biar ado ketawonyo. Tau jugo kando kau ini,” ungkap Mang Juhai idak galak ngalah.
Nah pas disuruh milih pelayan yang ngurusi mereka spa atau creambat, Mang Juhai ruponyo sial lagi. Kareno banyak milik betino yang nak ngurusinyo, akhirnya tepilih dengan yang jauh nian. ‘’Kakak pilih adek yang nomor itu yo,” ujar Mang Juhai. ‘’Idak nyesal apo kak,” kato pengurus salon. ‘’Idak dek, memang ngapo,” tanyo Mang Juhai. ‘’Idak pulok kak, dak apo kalo dak nyesal,” jelas pengurus salon itu lagi.
Begitu sampe ruangan perawatan, Mang Juhai baru sadar dengan omongan pengurus salon tadi. Sebab, waktu diajaknyo ngomong, baru ketahuan kalo betino pilihannyo itu, iyolah betino jadi-jadian alias waria. ‘’Nah pantas pengurus salon tadi ngomong idak nyesal apo, ruponyo betino jadi-jadian yang aku pilih ini,” gumam Mang Juhai. Alhasil, selesai creambath, Mang Juhai jadi katoan duo sohib kentalnyo.
‘’Masih mak lamo tulah selera kamu tu kando, nyari betino jadi-jadian pecaknyo,” kelakar Mang Benu. ‘’Neh kamu beduo ini nak ngolahke tulah. Aku milih budak itu, biar idak katek nafsunyo. Kan kito nak tobat, kalo milih betino nian, lokak tegoda iman kando kau ini,” terang Mang Juhai.
‘’Sudahlah kando, kito ni la lamo bekawan, ngaku bae kalo kamu tu salah pilih. Makonyo jangan jingok belagaknyo, tapi pilih yang normal bae kando, walaupun Cuma ngurusi perawatan kito,” timpal Mang Oding. ‘’Yo sudahlah, dak usah dibahas lagi yang mak itu,” tambah Mang Juhai nutup omongan. Hahaha, kalo kamu nak perawatan nian, samo bae kando, biar yang ngelayani betino atau betino jadi-jadian. (sam)