DIDUGA kareno curiga, Bik Jubai nyuruh Mac Dul, melok Mang Juhai senam bareng Dahlan Iskan, di Kambang Iwak, kemarin. Makmano ceritonyo laju curiga mak itu yo, baco bae ceritonyo dibawah ini.
Pagi kemaren, Mang Juhai berencano melok senam sehat Dahlan Iskan (DI) Style di Kambang Iwak. Sebab, Mang Juhai dan Mang Oding yakin disano banyak ketemu kawan-kawan lamonyo, dari kalangan berbagai profesi. Tapi itulah, baru bae mereka nak berangkat, tibo-tibo Bik Jubai nyuruh Mang Juhai ngajak Mac Dul melok senam itu.
‘’Kak, ajak Mac Dul ini senam sehat itu, kan sekalian jalan-jalan,” ujar Bik Jubai. ‘’Nah dek, kagek dak muat motor, sebab kakak la janjian dengan Oding,” simbat Mang Juhai. ‘’Neh, kakak nak pegi kan, yo ajak Mac Dul ini, dio jugo galak kesano. Kalo idak ngajak mac Dul, berarti kakak dak boleh pegi jugo makmano,” tegas Bik Jubai.
‘’Ngapo laju nak melok itu nak,” tanyo Mang Juhai samo Mac Dul, yang sudah besiap masang sepatu. ‘’Yo, aku ni melok bae Bah, Mak yang nyuruh,” jawab Mac Dul polos. ‘’Nah, memang ngapo adek nyuruh Mac Dul melok ini, ado apo nian,” ucap Mang Juhai samo Bik Jubai. ‘’Ooh jadi kakak nak tau nian ngapo Mac Dul harus melok,” Bik Jubai balek betanyo.
‘’La iyolah dek, memang ado apo nian,” desak Mang Juhai. ‘’Mak ini kak, kapan senam mak itu, pasti banyak betino cantik pake pakaian seksi. Kagek kamu bukannyo melok senam, laju nak nyuci mato bae. Nah kapan ado Mac Dul, berarti aku ado mato-mato disano. Soalnyo, kakak idak akan pacak nyogok Mac Dul, kareno la ku kunci,” tutur Bik Jubai.
‘’Oy dek, kan kakak sekarang la betobat, ngapo nak curiga lagi. Yo sudah kalo belum pecayo, biarlah Mac Dul melok,” ungkap Mang Juhai. ‘’Yo dak apolah kando, Mac Dul melok, siapo tau ado rejekinyo dio disano, pacak kito menang melok doorprizenyo. Lumayan ado duo lembar kupon gratis, siapo tau Mac Dul benasib, dan kito pacak dapat hadiahnyo,” tambah Mang Oding yang ternyato sudah didepan rumah mereka. Hahaha, jangan dicurigai terus Bik, kalo kagek dak pacak ngapo-ngapo lagi mamang kami tu. (sam)