GARA-gara agak menges pas naik tango ruko tempat rapat timses caleg jagoannyo, Mang Juhai laju jadi katoan kawan-kawannyo sesamo timses, termasuk Mang Oding. Makmano ceritonyo, baco bae beritanyo dibawah ini.
Sore kemaren, Mang Juhai dan Mang Oding datang ke salah sikok ruko tigo lantai dikawasan Jalan Jenderal Sudirman, yang memang jadi markas pemenangan salah sikok caleg jagoannyo, yang nak betarung pada Pemilu Legislatif (pileg) bulan April 2014 ini. Alhasil, sampai di lantai tigo ruko itu, nafas Mang Juhai ngos-ngosan alias kejingokan menges.
‘’Ngapo kando, pecak berat nian olahraga kamu itu. Pecak uwong abes dikejar anjing itu,” tanyo salah sikok kawan mereka yang sesamo timses, yang memang sudah datang duluan. ‘’Biaso bae lur, ngapo la agak susah bejalan ini. Pecak saro nian naek ke lantai tigo ruko ini. Raso idak ke sampe, mano kaki pegal galo,” jawab Mang Juhai dengan suaro terbata-bata, sambil ngatur nafasnyo yang ngos-ngosan.
Spontan bae seluruh kawan-kawannyo di timses, apolagi Mang Oding disebelahnyo, langsung ketawo ngakak. ‘’Nah, kito usulke buat lift bae disini kagek kalo mak itu. Soalnyo, kasihan dengan kando kito ini, pecak susah nian naek tanggo ke lantai tigo ini. Caro uwong la tuo lah, agak saro, apolagi diajak begawe berat,” kelakar Mang Oding yang buat seluruh uwong disano tambah dak berenti ketawo.
‘’Benar nian itu kando, kito usulke buat lift khusus kando Juhai,” timpal kawannyo sesamo timses lainnyo. ‘’Neh kau ini Ding, nak ngolahke nian pecaknyo. Mentanglah kau idak menges naek tadi. Sebangso baru bekawan, la luntur persahabatan kito Ding. Cuma yo, pacak ngurut dado bae ini, secaro la samo-samo megang kartu as lah,” ungkap Mang Juhai senyum-senyum malu.
‘’Biaso bae kando, kawan-kawan disini cuma nak nyari bahan ketawo bae. Kebetulan kamu yang jadi bahan hari ini, gara-gara menges naek tanggo, caro la tuo nian. Kalo aku kan masih agak mudo dari kamu,” tutur Mang Oding lagi. ‘’Yo sudah kawan-kawan kito mulai bae rapatnyo. Kalo masih nak ngatoi aku, balek aku sekarang,” tambah Mang Juhai senyum-senyum.
‘’Yo sudah kito mulai rapatnyo bae,” ujar Ketuo timses pemenangan caleg disano. ‘’Setuju,” tambah beberapo timses secaro serentak. Hahaha, makonyo mang, jangan banyak gawe dak keruan maso mudonyo. Ini umur masih dibawah 50 tahun, tapi tenago la abes, malah naek tanggo bae la amper abes nafas. (sam)